Tikit bas ari Bintulu berapa hari sebedau Gawai udah abis dijual
Tikit bas pulai ke menua diri beserimbai enggau pengerami ngintu Hari Gawai Dayak taun tu udah abis dijual ungkup haribulan pejalai bas kena 28, 29 enggau 30 Mei tu kelebih agi pejalai ari Bintulu laban kurang deriba bas.
Penguasa Stesyen Ekspres Lanang Faizal Osman madah, tikit ti udah abis dijual tu ukai laban mayuh penumpang tang ketegal deriba bas enda chukup maya tu dikena mai bas ti udah disediaka.
“Diatu enda baka sebedau Atur Nagang Pemindah (PKP), mayuh deriba bas udah ngetu gawa.
“Tusah deka ngiga deriba bas pulai gawa baru laban sida ti udah gawa ba palan bukai.
“Kitai ngembuan mayuh bas tang penanggul nya tadi nadai orang ti deriba,” ku iya lebuh ti ditanya pengarang berita bedau lama ti udah.
Ku iya, ungkup tiga haribulan ti bekaul nya tikit pejalai malam udah abis dijual lalu semina sekeda penuduk ti disediaka ungkup pejalai maya ari tawas.
“Aku ngasaika mayuh ari sida ngena perengka pengangkut kediri diatu laban kitai ngembuan jalai alun ti manah, semadi mih ruang bilik ti besai, nyangka sida bisi pilih bukai dikena pulai enggau ngena bas,” ku iya.
Iya madah, bas ekspres diatu bejalaika operasyen enda sama baka sebedau tu enggau mayuh agi pejalai sekali maya.
“Ambika chunto, ungkup pejalai pukul 6 pagi, kitai nyangka bisi dua ngagai tiga buah bas tang diatu nya nitihka atur jam pejalai lalu ungkup nya enda ulih nyamin nama-nama,” ku iya seraya nambah, palan ti dituju sida ke pulai iya nya ke Sibu enggau Sri Aman maya pengerami ngintu Hari Gawai Dayak tu.
Ku iya nerang, bala orang tambang udah meli tikit tumu, enda ulih temu dipinta kenya aja, pengudah mayar sida dipadahka enda ulih ditikal pulai baru nyema sida ngaga pemutus deka nginsil pejalai.
Ku iya, terminal bas ditu deka dedat laban mensia mayuh ti deka ngena perengka pengangkut bas ninting musin pengerami tang semina bisi beberapa buah bas aja ti disediaka.
“Mayuh ari kompeni bas ekspres diatu betapi enggau penanggul ti sama, deriba majak tuai lalu aku pechaya dalam timpuh 10 taun kitai melabaka semina beberapa buah bas ti deka bejalaika operasyen kelimpah ari trend ke alai nyema deriba bas dibayar besai agi, sida deka nyanggup bejalaika pengawa,” ku iya.
“Diatu deriba lori bulih gaji ti besai agi,” ku iya seraya nambah 85 peratus deriba bas diatu udah beumur 50 taun ke atas ke alai sida ti beumur urung 20 taun nadai ngembuan pengerindu ati deka nyadi deriba bas.
Iya mega nambah, kompeni tu ngelangkar deka ngiga deriba bas sementara dikena pejalai bas tambah sida.
Beserimbai enggau nya, Hajijah Yunus ti ngatur kaunter tikit Bas Borneo madah, semua penuduk ungkup tikit ti dijual kena 27 nyentuk 30 Mei udah abis dijual.
“Kitai bisi dua buah bas ungkup pejalaika Bintulu-Sarikei-Sri Aman enggau Bintulu-Betong-Lubok Antu.
“Mayuh ari palan ti endur deka dituju iya nya ngagai Sarikei enggau Sri Aman,” ku iya.
Iya madah, tikit bas mayuh ti udah tembu dijual maya deka Hari Gawai lalu ungkup taun tu orang tambang udah meli itkit sida tumu maya pun bulan Mei lalu kompeni bedau mutuska deka nyendiaka pejalai bas tambah ungkup Gawai.
Nurtijah Tira ari Bas Eva madah, sama baka kompeni bas bukaim sida mega udah netapka lebih penuduk ungkup sida ti deka pilau ke menua diri maya pengerami Hari Gawai tu.
“Enti dipeda ari semua timbal enda tentu manah nyema dibandingka enggau sebedau dituntung pengelekai igi penyakit COVID-19,” ku iya lebuh ti ditanya bekaul enggau tikas pemansang industri bas ekspres.