Tikas pemerat barang ke diundan perengka pengangkut berat di Sarawak patut disemakaka enggau Semenanjung
BINTULU: Tikas pemerat barang ke diundan perengka pengangkut berat patut disemakaka enggau Semenanjung ambika ngemudah sereta ngelancharka pejalai perengka pengangkut berat ba tetiap jalai di negeri tu, pia ku Sapit Menteri Perengka Pengangkut Sarawak Datuk Dr Jerip Susil.
Ku iya, undang-undang bekaul engagu tikas pemerat ti ditetapka di Sarawak naka ke diatu semina 38 tan aja enti dibandingka enggau di Semenanjung ti netapka pemerat barang ke diundan tau manggai 50 tan.
“Ke tuju nya, aku enggau opis menteri deka madah sereta berandauka pekara tu enggau Perintah Besai nyengkaum Opis Menteri Kereja Raya ambika ikas pemerat ti ditetapka di Semenanjung tau dikena di Sarawak,” ku iya.
Iya bejaku munyi nya lebuh bejadi pengerami nutup Makmal Bekaul Atur Sekat Berat: “Penyelesaian Untuk Mengharmonikan Operasi Kenderaan Berat Di Sarawak” ti diatur ba Golden Bay Hotel Bintulu, lemai Hari Empat tu tadi.
Ku iya, pengawa nyemaka tikas pemerat barang ke diundan di Sarawak enggau Semenanjung deka nentuka tetiap iku pengemeran enggau orang ke mai perengka pengangkut berat di Sarawak bulih pemaik baka di Semenanjung.
“Aspek mai perengka pengangkut berat mega sebaka nyadi entara pekara ti ditegika Perintah Sarawak ti minta hak kitai ti ditetapka dalam Sempekat Malaysia 1963 (MA63) ke alai negeri tu bisi hak nerima nama aja perengkaguna sebaka engagu Perintah Besai,” ku iya.
Nya alai ku iya, Sarawak enda patut dienahhka bebida ari Semenanjung dalam aspek mai perengka pengangkut berat di menua tu.
Perintah Sarawak nengah Opis Menteri Perengka Pengangkut Sarawak dikena ngepunka, ku iya deka minta Perintah Besai nyerenih baru semua atur sekat perengka pengangkut berat di Sarawak.
“Aku pechaya, nengah program makmal pengelama dua hari ti diatur tu ngenauka semua ke bisi enggau tau ngumpul pemadah enggau data ti komprehensif sebedau kerrtas perambu bekaul enggau nya dibantaika ila,” ku iya.
Ketuai Bagi Perengka Pengangkut Darat enggau Logistik, Opis Menteri Perengka Pengangkut Sarawak, Julin Alen enggau Opis Perengka Pengangkutan enggau Jalai (JPJ) Sarawak, sama bisi ngulu program nya.