MIPD nyadi ketuai berandau enggau MOT bekaul ngambi pulai Penyangkai Kapal Bintulu
Opis Menteri Infrastruktur enggau Pemansang Palan Penyangkai Kapal (MIPD) Sarawak diberi tanggung pengawa nyadi ketuai berandau enggau Opis Menteri Perengka Pengangkut (MOT) di Putrajaya bekaul enggau juluk negeri deka ngambi pulai Palan Penyangkai Kapal Bintulu ke ari baruh opis menteri nya (MOT) diatu.
Menteri MIPD Sarawak, Datuk Amar Douglas Uggah Embas madahka, Premier Sarawak Datuk Patinggi Tan Sri Abang Johari Tun Openg meri tanggung pengawa nya maya baum tiap bulan kabinet kemari (ensanus).
“Abang Johari kala madahka iya semina dekaka siti palan penyangkai kapal di Bintulu,” ku iya.
Sapit Premier Sarawak tu ngenang pekara nya maya ti gempuru ngintu pengerami Taun Baru China 2023 Opis
Menteri ba sebuah hotel ditu, malam ensanus.
“Tu ukai tanggung pengawa ti mit. Diatu kitai mega bisi Palan Penyangkai Kapal Samalaju.
“Kitai patut meda Ordinan Opis Bekuasa Penyangkai Kapal 1961.
“Kami ngarap bisi pengawa bejuraika rang undangundang maya aum Kunsil
Nengeri (DUN) ujung taun tu,” ku iya.
Ngenang pekara nya iya madahka, perintah negeri deka nyadika Palan Penyangkai Kapal Bintulu nyadi sebagi ari kluster palan penyangkai kapal negeri, ari baruh Opis Penyangkai Kapal Pusat ti deka opis kediri nitihka undang-undang negeri.
Kelimpah ari nya, Uggah mega madahka MIPD diberi siti agi tanggungpengawa besai iya nya ngasilka Pelin Besai Penyangkai Kapal Sarawak.
Tuju pansik tu dikena ngemanahka agi servis palan penyangkai kapal, pengelikun palan penyangkai kapal nengah pengawa masang Vessel Trafic Management System (VTMS), perengkaguna Aids to Navigation (AtoN), kren, kereja numbak enggau nyerungkai peluang dagang baru, ku iya.
Perintah mega dalam timpuh sama ngungkupka sepenyampau RM4 juta dikena bejalaika pansik ti berengkah enggau Opis Penyangkai Kapal Miri.