117 buah sekula misyen nerima geran RM14,055,120 ari UNIFOR
Bisi 117 buah sekula misyen ditu, Sibu enggau Miri nerima geran sepenyampau RM14,055,120 ari Unit Pekara Jalai Pengarap Bukai (UNIFOR), kemari.
Geran nya disuaka Sapit Premier Sarawak, Datuk Amar Douglas Uggah Embas, ti mega menteri megai tanggung pengawa nyaga UNIFOR, ba opis iya ditu.
Ari penyampau nya, sepenyampau RM5,905,530 diberi ngagai 49 buah sekula ari baruh Anglican Dioces of Kuching.
Menteri Pelajar, Inovasyen enggau Pemansang Pengelandik, Datuk Roland Sagah Wee Inn nerima check nya ari Uggah, ngarika sekula.
Sapit Menteri Kaunsil
Kandang Menua enggau Pengawa Berumah Datuk Dr Penguang Manggil nerima chek RM3,779,520 ngarika 31 buah sekula ari baruh Roman Catholic Archdiocese of Kuching.
Kelimpah ari nya, Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan nerima 23 iti chek sepenyampau RM2,716,530 ngarika 23 buah sekula ari baruh Roman Catholic Diocese of Sibu.
Sama mega nerima chek nya kemari, Menteri Industri Barang Pemakai, Komoditi enggau Pemansang Kandang Menua, Dato Sri Dr Stephen Rundi Utom ti nerima tujuk iti chek sepenyampau
RM826,770 ngarika tujuh buah sekula ari baruh Methodist Chinese Annual Conference (SCAS).
Tujuh buah sekula ari baruh Roman Catholic Diocese of Miri ti diungkupka sepenyampau RM826,770 ti diterima Menteri Perengka Pengangkut Dato Sri Lee Kim Shin ke nyadi pengari nerima chek nya.
Direktor UNIFOR Datu Jack Aman nyempulang Uggah nyuaka chek nya.
Apin lama, kena 1 Februari tu tadi, Premier Sarawak Datuk Patinggi Tan Sri Abang Johari Tun Openg bisi nyuaka chek geran sepenyampau RM944,880 ngagai lapan buah sekula di bagi menua Kapit.