PDP deka terus chakah ngatur program pengasih dalam taun tu
LIMBANG: Parti Demokratik Progresif (PDP) deka terus chakah ngatur program pengasih taun tu mantu sida ti begunaka nya sereta ke dituntung penusah.
Eksko PDP Nengeri ti mega Ketuai Nembiak PDP Batu Danau Kunsilor Daniel Taha madahka raban sida mega deka ngaul kerejasama begulai enggau mayuh macham gerempung, gerempung ukai dikuasa perintah (NGO) dikena ngemanahka agi program ngumpul wang turu sereta pemeri dikena mantu sida ti dituntung penusah.
“Kes penusah ngenyit ti udah nganguska 39 pintu bulik rumah panjai Bujang Rantau Kiran bedau lama ti udah chukup ngenyinuka semua komuniti nyengkaum raban kitai.
“Kitai beterima kasih PDP iya nya entara ti pemadu tumu meri bantu nengah wang turu sereta pemeri ari mayuh macham raban ti udah mantu baka barang pemakai, ai irup enggau kereban dapur ti diguna,” ku iya nengah siti penerang kemari.
Daniel madah, taja pan betapi enggau pemar ari sukut endur enggau logistik ti jauh ari pasar, gaya jalai ti endang chukup mayuh penguji kelimpah ari penanggul nadai bungkur perengkaguna telekomunikasyen enda nyadi penanggul dalam neruska misyen meri bantu pengasih tu.
“Kitai chukup beterima kasih ngagai sida ti udah meri bantu ke udah manah ati, dalam nyaup sida ti tasah dituntung penusah angus ke udah lenyau palan pengentap pendiau sida.
“Entara nya, Raban Nembiak PDP, Komiti Tamu Medamit, Gerija Methodist Limbang, Gerempung Indu Misi (SNPA), raban Fitness Fit For Run, raban Fitness Geng Padang, mensia mayuh, gerempung ti bekaul, NGO enggau sida ti udah manah ati,” ku iya.
Daniel madahka pengeransing mantu pangan diri ti dikemeranka lalu udah nyadi budaya dalam raban Nembiak PDP begulai enggau bala bukai kenyau ari suba patut terus dinanka kelebih agi dalam nyaup sida ti begunaka bantu.
Kena pagi 25 Januari nyin tadi, bisi 226 peranak Rumah Panjai Bujang Rantau Kiran udah lenyau semua reta tengkira pengudah palan pengentap pendiau sida karam di darat ti nyadi urung pukul 6:48 pagi.
Taja pan pia, nadai kes bebadi nyawa diripot nyadi ba kes penusah ngenyit ke udah nganguska 80 peratus rumah panjai tu ke bisi 39 pintu bilik.