Projek mansik, belajar Sungai Sarawak Kanan ti keterubah dipejalaika di nengeri tu
Projek belajar pasal Navigation of Sungai Sarawak Streching ari Kuching Waterfront nyentuk ke Jeti Pasar Siniawan, Sungai Sarawak Kanan iya nya pansik keterubah dipejalaika bekaul enggau sungai di negeri tu.
Kaban Kunsil Negeri (ADUN) Serembu, Miro Simuh madahka, projek mansik nya ti dipelanja perintah negeri urung sepenyampau RM300,000 benung dipejalaika, dipelaba ulih tembu dalam timpuh enam bulan.
Nitih ku iya, pemayuh sungai di negeri ti alai perengka pengangkut sungai baka baka ba Sungai Rajang, Kapit, Baleh, Belaga, Baram enggau ke bukai apin kala dipejalaika pengawa mansik, sereta ari Waterfront Kuching nyentuk ke Siniawan iya nya projek mansik keterubah dipejalaika.
“Aku ngasaika tu (pansik Sungai Sarawak ari Waterfront Kuhing nyentuk ke Jeti Pasar Siniawan)ulih dikumbai projek pilot tauka pemungkal, dipelaba ulih nyadika malin perintah negeri jemah ila, engka mega ulih ngungkupka mayuh agi belanja kena bejalaika mayuh agi pengawa belajar enggau mansik bekaul enggau navigasyen sungai, penyampau ekonomi enggau pemesai reti komuniti ba semanjai sungai.
“’Blueprint’ tu pekara ke beguna ngagai perintah negeri dikena ngaga polisi jemah ila. Tu pemun ti manah, sereta sukung YAB Primier (Datuk Patinggi Tan Sri Abang Johari Tun Openg) enggau semua orang bisi meda pemesai reti sungai ti nyengkaum senentang ekonomi, budaya sereta komuniti.
“Nya alai, tu singkang keterubah, dua minggu udah turun padang bejalaika pengawa mansik. Timpuh ngaga projek kajian tu urung enem bulan. Dikearapka ulih tembu ba bulan Jun ke deka datai tu,” ku iya.
Miro madahka pekara nya lebuh dikerandau raban pengarang berita pengudah iya bejadika ‘HAZID (Hazard Indefication) and Impact Review Workshop’ ke diatur ba sebengkah hotel ditu, kemari.
Bejaku baru iya nerangka, belanja RM300,000 ari perintah negeri nya semina dikena bejalaika pengawa mansik sereta enda nyengkaum pengawa nasih sungai nya.
Ba aum pengarang berita ti sama, Direktor AJA Prima Sdn Bhd, Kapten Bernard Idit madah woksyop nya ti digulu pengaga polisi ari mayuh bengkah ejensi perintah besai enggau negeri ti bekaul.
Ku iya nengah worksyop nya semua peresta ulih berandau sereta meri penemu diri bekaul enggau chara ti pemadu engkaman nentuka Sungai Sarawak likun alai navigasyen kelebih agi berengkah ari Kuching Waterfront nyentuk ke Jelatung Pasar Siniawan.
“Pengawa mansik tu mega ukai semina mekuh ngagai navigasyen tang nyengkaum pekara bukai baka ulih nyadi pematak industri dagang temuai, baka ke dipadah YB Miro, kitai deka nyadika sungai tu nyadi sungai ekonomi ungkup peranak ba endur nya.
“Lalu nengah kajian tu mega kitai deka nentuka semua orang ti ngena navigasyebn nya berasai likun 24 jam siang malam maya ari poin siti nuju ngagai poin siti (Kuching Waterfront ke Jeti Pasar Siniawan,” ku iya.