Perintah Sarawak deka nentuka Sibu mansang sereta tebilang
Udah ngungkupka RM1 bilion dikena bejalaika langgur pemansang baru Sibu mutarka penanggul ti suah ditapi peranak bagi menua tu
SIBU: Presiden Parti Rakyat Bersatu Sarawak (SUPP) Dato Sri Dr Sim Kui Hian madah, Premier Sarawak chukup ibuhka langgur pemansang baru ba Sibu enggau udah ngungkupka duit RM1 bilion ke tuju nya.
Iya mega madahka, perintah Belanda udah madahka peneka tauka juluk meri bantu teknikal kena mutarka penanggul ampuh bah di Sibu.
“Perintah Sarawak mega deka ngelawa ke Belanda ujung bulan tu berandauka chara mutarka penanggul nya.
“Pelin pemansang baru tu mega deka mungkur tebal agi kandang menua Sibu enggau mega nyengkaum ngaga pegung,” ku iya lebuh bejaku ba Pengerai Ngitu Taun Baru China SUPP Sibu ba Dewan Suarah kena malam Hari Empat (Khamis).
Bekaul enggau pekara tu, Sapit Premier Sarawak nya meransang peranak Sibu ngambika enda bebeli rumah di Kuching laban Sibu deka
ngerembai maju jemah ila.
“Sibu deka nyadi kaya enggau tebilang. Tu langgur perintah ungkup Sibu,” terang iya.
Dr. Sim mega madahka Sarawak udah betapi enggau ubah besai kenyau 10 taun ke udah ari baruh iring Niang Pehin Sri Tan Sri Adenan Satem enggau Premier Sarawak Datuk Patinggi Tan Sri Abang Johari Tun Openg.
Dr. Sim madahka, Sarawak udah bulih merdeka politik
enggau ekonomi kenyau ari nya, kelimpah ari udah nambahka penatai pemisi ari RM7 bilion ba taun 2018 ngagai RM11.9 bilion ba taun 2022.
Ku iya, perintah Sarawak nyendiak mayuh bengkah bantu ngagai rayat nyengkaum RM6.7 bilion ungkup kena mantu rayat enggau orang dagang maya pandemik COVID-19.
“Aram kitai sama sayau enggau nyaga Sarawak sereta bebendar nuju negeri dalam
pemaik enggau pengelantang lebuh manggai 2030,” ku Dr. Sim
Sama bisi datai ba pengerami nya Sapit Premier Pengerai Mensia Mayuh, Pengawa Berumah enggau Kaunsil Kandang Menua II enggau ADUN Pelawan Michael Tiang, ADUN Bukit Assek Joseph Chieng, Senator Robert Lau Hui Yew, Temenggong Datuk Vincent Lau enggau Chairman Majlis Perbandaran Sibu (MPS) Clarence Ting.
“Sibu deka nyadi kaya enggau tebilang. Tu langgur perintah ” ungkup Sibu.