Anang sanggu bedagang dikena ngangkatka penatai pemisi ruang bilik, ku Anita
KUCHING: Bedagang entara sebagi ari pengawa ti manah dalam ngangkatka penatai pemisi ti meruan dalam ruang bilik, pia ku Anita Nyuta, 35, siku ari orang dagang ke ngemansutka mayuh produk entara nya lanyih jani tauka diberi iya nama ‘An’s Krrupp Krrupp’.
Anita ti penatai asal ari Tatau tu madahka iya berengkah ngemunka dagang bejual lanyih jani tu ba taun 2020 lebuh menua agi ari baruh Atur Nagang Pemindah (PKP) pandemik COVID-19.
“Keterubah produk tu dipansutka aku, maya nya benung Atur Nagang Pemindah (PKP) pandemik COVID-19 lalu semua pengawa ngelakuka produk dagang tu digaga ngena chara ‘online’.
“Maya nya peminta mega chukup mayuh ketegal mensia mayuh enda ulih mindah kin kia laban pandemik COVID-19,” kuk iya.
Berindik ari peminta ti tinggi tu, Anita udah ngerembaika dagang enggau ngiga pengari iya nyual ba palan bukai tauka ‘seller’ ti ulih nyaup iya nerima peminta ari penguna.
“Berindik ari peminta ti mayuh ukai semina ba kandang menua besemak, aku ngembuan runding ngiga pengari ti ulih nyaup aku nerima peminta lalu maya nya aku bisi 10 iku keterubah.
“Peminta majak mayuh maya PKP, aku teulihka 50 nyentuk 100 iku seller ti nyaup aku bejual produk tu ba mayuh bengkah kandang menua kelebih agi di
Sarawak,” ku iya.
Nengah tu mega, Anita chukup temegah ati laban dagang ti dimunka iya tu mujur lalu ukai semina meri penguntung ngagai iya siku aja, tang ulih ngangkatka penatai pemisi orang bukai kelebih agi ungkup pengari iya ti nerima peminta.
“Nya alai ba runding aku, pemisi ekonomi digital tu meri empas ti positif kelebih agi dalam pengawa dagang laban taja kitai jauh tauka bisi tagang pemindah, tang agi ulih bedagang nengah chara ‘online’.
“Tu meri pemaik kelebih agi ngagai orang indu ti nadai pengawa di rumah dalam ngangkatka penatai pemisi diri enggau ruang bilik,” ku iya nambah.
Naka ke diatu, dagang bejual lanyih jani Anita tu mega agi nerima peminta ti hukup manah lalu iya merambu muka premis ti dikena iya ngaga proses lanyih jani tu.
Taja pia, berindik ari peminta ti mayuh stok mata jani bisi pemar deka diulih.
“Taja pia, dalam tetiap pengawa dagang endang enda ulih ngelarika diri ari penanggul, tu ti nyadi peransang dalam aku ngerembaika agi dagang tu.
“Aku mega ngarapka produk tu ukai semina ba makit menua tu aja, tang mega ulih rembus ke dagang antarabansa,” ku Anita meri penerang.