Pengajar di Sarawak dilalau ngerejista diri enggau KGBS, ngintu pengelantang pendiau kaban gerempung
KUCHING: Bala pengajar di nengeri tu dipinta nyadi kaban Gempung Gerempung Bumiputera Sarawak (KGBS) ngambika semua isu ti bekaul enggau pelajar ulih diberi nengah gempung gerempung tu.
Pemesai Pelajar Pelilih Menua Lawas Sawal Pandin madah, KGBS nyata udah mayuh negika guna enggau pengelantang pendiau pengajar kenyau ari lama suba.
“NAma ti kitai bulih tu iya nya pengeransing KGBS dalam ngintu pengelantang pendiau kaban.
“Gempung gerempung tu iya nya jalai ti engkeman ngagai kitai ngeripot penanggul enggau isu ti bekaul enggau pelajar, ukai nya ngena media rama,” ku iya nengah penerang media kemari.
Iya madah munyi tu lebuh pengerami Apresiasyen enggau AUm Besai KGBS Pampang Lawas di Lawas bedau lama ti udah.
Beserimbai enggau tu, Presiden KGBS Zulkiflee Sebli nengah jaku pengelalu iya madahka pengelantang ati diri sereta pengaga ati ngagai KGBS Pampang Lawas laban ti mujur ngatur aum besai tu.
Ku iya madah, KGBS
Pampang Lawas iya nya entara pampang ti kepenudi ngatur aum besai sebedau Aum Nyiri Komiti KGBS Besai ti dipelabaka deka diatur kena bulan Februari ti deka datai.
Berindik ari tu, iya ngarapka KGBS pampang tu deka neruska program ti udah diperambu.
“Pia mega kitai di KGBS Besai deka seruran mantu enggau meri sida buah runding dalam pekara bekaul enggau pelajar sereta pengawa ngajar,” ku Zulkiflee.
Dulu ari tu, maya Aum Besai KGBS Pampang Lawas tu, Muhammad Nazri Rosli udah dichiri nyadi Chairman KGBS Pampng Lawas ungkup sesi 2024-2026.
Dalam jaku pengelalu keterubah iya, Muhammad Nazri meri besai terima kasih ngagai kaban KGBS Pampang Lawas ti pechayaka iya lalu milih nyadi chairman ke baru.
Maya pengerami tu mega bisi diatur Pengerami Apresiasyen dikena ngintu lebih 20 iku sida ke udah pinchin kaban KGBS Lawas kelimpah nyuaka insentif pelajar ngagai bala anak kaban KGBS ti nyulut dalam peresa SPM ti udah lalu.