Sarawak deka bisi 23 buah PEDi nengah program USP
Sarawak deka bisi 23 buah Pusat Ekonomi Digital (PEDi) baru nengah program Pemberian Perkhidmatan Sejagat (USP), ti dipelaba deka digaga enda lama agi sereta dipelabaka tembu semua lebuh manggai ujung taun 2024.
Menteri Utiliti enggau Telekomunikasyen, Dato Sri Julaihi Narawi madahka perintah nengeri nyukung inisiatif ti dipejalaika Opis Menteri Telekomunikasyen nengah Suruhanjaya Komunikesyen dan Multimedia Malaysia (SKMM) ti nyendiaka semua 23 buah PEDi ba 23 sitak Kunsil Nengeri (DUN) di nengeri tu.
Iya bepenemu pemansang PEDi nya ulih nyukung pelan strategik pemansang pengudah COVID-19 (PCDS) 2030 enggau Sarawak Digital Economy Blueprint 2030 dikena nyungkakka Sarawak nuju nyadi nengeri maju enggau bepenatai pemisi tinggi lebuh manggai 2030.
“Pagi tu (kemari), kitai nyukung sereta nyambut manah pengawa numbuhka 23 buah PEDi baru di Sarawak ari baruh program USP ti dipejalaika SKMM, kelebih di menua pesisir.
“Ba penemu aku, PEDi, iya nya entara ‘enabler’ ti beguna ngagai PCDS 2030 enggau Sarawak Digital Economy Blueprint 2030, dalam pengeran kitai deka nyikap rayat ngena pengelandik enggau penemu digital, di dalam kitai betapi era pengerembai teknologi pemadah enggau ekonomi digital.
“Setipak enggau aspiresyen tauka juluk Sarawak Digital Economy Blueprint 2030,
SKMM dikearap ulih ngemeratka ba tiap PEDi ngambika fokus ngagai transformesyen digital nengah chara ngiring enggau nempa komuniti orang dagang kelebih agi mikro di menua pesisir, ngena teknologi digital di dalam aktiviti dagang sida,” ku iya.
Julaihi madahka pekara nya lebuh bejaku bejadika ‘Majlis Perasmian dan Taklimat Pelaksanaan 23 PEDi Bahari di Sarawak’ ti diatur ba sebengkah hotel ditu, kemari.
Entara DUN ti digaga PEDi baru nyengkaum Krian, Telang Usan, Ba’Kelalan, Gedong, Saribas, Semop, Belaga, Samariang, Padungan, Pending, Batu Lintang, Simunjan, Bukit Assek, Tanjong Batu, Kemena, Pelawan, Nangka, Bukit Saban, Sebuyau, Batu Kitang, Kota Sentosa, Satok enggau DUN Batu Kawah.
Dulu ari nya, Julaihi ti mega
ADUN Sebuyau meri puji sereta arap bendar ngagai Telekom Malaysia (TM) ti udah diberi tanggungpegawa nyadi ejensi ti bejalaika tauka ngaga 23 PEDi baru di sereta Sarawak, ulih nyendiaka perengka enggau nyenyampatka pengawa nyendiaka PEDi nya.
“Aku ngarika perintah Sarawak meri terima kasih ngagai perintah besai laban ti ibuhka transformesyendigitaldinengeri tu, sereta kitai arap bendar PEDi iya nya siti ari infrastruktur ti amat beguna dalam kitai mai Sarawak ke mua.
“Dalam timpuh ti sama, kelimpah ari 23 PEDi baru tu, di Sarawak baka ti ditemu kitai iya nya sebuah wilayah ti besai, engka jemah ila aku ngarapka lebih mayuh agi PEDi ulih diperunding sereta dikerembaika bepelasarka rampa menua Sarawak ti besai.
“Nya alai kitai ngarapka jemah ila, engka bisi DUN begunaka lebih ari sebuah PEDi, kitai ngarapka pekara tu ulih diperundingka,” ku iya.
Ba jaku pengelalu, Direktor, SKMM Nengeri Sarawak, Adiman Ajem madahka, di Sarawak naka ke diatu bisi 133 PEDi ke endang udah bisi sereta tebal agi di kandang menua pesisir.
Iya madahka, PEDi nyendiaka servis internet ti deras sereta program latih ICT enggau e-dagang, seraya ti nyadi palan transformesyen ti ulih ngiring komuniti ba endur nya kelebih agi orang dagang mit ngambika ulih bedagang ngena platform digital.
“Nyentuk diatu, bisi 133 buah PEDi di Sarawak ti ari baruh SKMM. Lalu diatu PEDi deka fokus ngagai kerejasama enggau orang dagang,” ku iya.