Muzium Warisan Perindustrian Brooke Dockyard deka nyadi ikon dagang temuai
Pengawa ngaga muzium beungkus RM47 juta tu udah nyapai 86%, dipelaba tembu ujung taun tu
KUCHING: Pengawa ngaga Muzium Warisan Perindustrian Brooke Dockyard dipelaba tembu ba ujung taun tu sereta pemansang ngaga projek nya diatu sepenyampau 86 peratus.
Premier Sarawak Datuk Patinggi Tan Sri Abang Johari Tun Openg madahka, projek ti berega RM47 juta nya deka nyadi siti agi ikon dagang temuai di nengeri tu.
Iya madahka pengudah muzium nya tembu ila sereta pekara pengelikut ba tikas optimum, ia deka dibuka ngagai mensia mayuh.
“Projek tu udah dilanggur maya aku nyadi Menteri Dagang Temuai suba. Kitai ngemanahka agi Kuching Waterfront enggau Brooke Dockyard. Ia bisi sejarah ia empu, nyadi siti palan industri kapal enggau industri kena ngaga enggau nyeruri kapal di Sarawak, ditumbuhka Rajah Charles Brooke.
“Nya alai enggau latar belakang nya maya aku nyadi menteri dagang temuai laban kitai udah bisi jelatung kapal jauh ari Kuching ti nadai agi dikena nyadi jelatung kapal, nya alai kitai ngubah fungsyen nyadi
Datuk Patinggi Tan Sri Abang Johari Tun Openg
palan besejarah ti bekaul enggau industri kapal enggau maritim,” ku iya.
Iya madahka pekara nya maya dirandau raban pengarang berita nyerumba penemuai iya ngagai taba Muzium Warisan Perindustrian Brooke Dockyard ditu, kemari.
Sama bisi datai Menteri Dagang Temuai, Industri Keratif enggau Seni Pemerindang, Dato Sri Abdul Karim rahman Hamzah enggai Direktor Brooke Holding Sdn Bhd , Dato Sri Wan Lizozman Wan Omar.
Abang Johari madahka kereja nyeruri tauka ngemanahka agi Brooke Dockyard benung dipejalaika sereta RM42 juta udah diungkupka sereta ditambah RM5 juta agi kena nyerurui sekeda kapal ti deka dipandangka dia.
Bejaku baru, sekeda barang sejarah baka ‘bebaling’ kapal, kren sereta kereban injin lama deka ditan nyadi barang pemandang ba muzium nya ila.
Nitihka iya, sekeda kapa ti kala dikena perintah dulu suba nyengkaum Rajah Brooke entara ia The Royalist, Zohara enggau Maimunah deka dipandangka ba muzium nya, laban ia ikon beguna dalam perintah sereta aktviti dagang maya nya suba.
“Kitai mega merambu ngangkatka endur tu nyadi palan ngelantang diri, engka kitai deka muka restoran.
Kelimpah ari nya, ditanya bekaul enggau ripot berita ti ngaulka Perintah Sarawak enggau Afrfin Bank Berhad ari sukut ngempu saham dalam bank nya, Abang Johari enda nyangkal tang iya enggau ngenang silik pekara nya.
“Aku enda berani meri penerang silik laban Affin Bank kompeni ti dalam lis Bursa Malaysia.
“(Berita) The Edge ngeripotka kitai (Sarawak) deka nambahka (saham) penyampau nyentuk 20 peratus. Nya eenda betul tang aku enda nyangkal, nunda jaku orang ‘enti nadai agin, kayu nya enda beguyat’,” ku iya.
Abang Johari mega nerangka Bank Pemansang Sarawak (DBOS) enda ngambi bagi dalam ngempu saham Affin Bank laban DBOS bisi mandat ia kediri, ti mantu sereta nyali dikena ngemansangka infrastruktur di nengeri tu.