Ketuka pengawa bebeli barang telekomunikasyen ‘second hand’, ku Julaihi
Menteri Utiliti enggau Telekomunikasyen, Dato Seri Julaihi Narawi bepenemu pengawa bebelika barang ‘second hand’ kelebih agi ti bekaul enggau kereban telekomunikasyen patut diketuka, ngambika juluk perintah ti deka nyendiaka infrastruktur nya di nengeri tu ulih nyapai juluk ti udah ditaga.
Iya ngarapka opis tauka autoriti ti bekaul ulih berati sereta muntanka pekara nya kelebih agi ke ti bekaul enggau bejual enggau bebelika barang ‘second hand’ tauka orang ti bejualka kabel, kena nyeliahka pengidup rayat ari tekeruga.
“Kitai ngarapka opis tauka autoriti ti bekaul ulih ngetuka ulah kelebih agi bekaul enggau pengawa bebelika barang ‘second hand’ tauka kabel tauka ke bukai, laban tu meri empas enda manah ngagai rayat.
“Kitai ngarapka opis tauka raban autoriti deka mansik pekara nya. Kitai ngarapka ordinan netapka barang ‘second hand’ ulih lengkas dipejalaika awakka ‘vandalisme’ tauka ngerusakka barang enda nyadi, laban pekara nya nyadi bepanggai ngagai (peminta)makit.
“Kitai amat beratka pekara tu sereta ngarapka opis tauka autoriti ti bekaul deka bejalaika atur ti terit laban (ulah ngerusak barang tu) ngeruga pengidup rayat,” ku iya.
Iya madahka pekara nya lebuh dirandau raban pengarang berita pengudah iya ngulu sereta bejadi ‘Majlis Perasmian dan Taklimat Pelaksanaan 23 PEDi Baharu di Sarawak’ ti diatur ba sebengkah hotel ditu, kemari.
Bejaku baru, Julaihi madahka kelimpah ari minta kerejasama komuniti sereta tuai komuniti, opis menteri taun nyin kemari mega bisi ngatur kimpin anti-vandalisme ba sekula sereta deka dipajak enggau dikerembaika ba taun ke deka datai.
Perintah Sarawak mayuh nyendiaka kereban ti nyengkaum ai, elektrik sereta kereban telekomunikasyen enggau kebukai, tang ti ngirauka, ku iya, ba sekeda endur kereban ti disediaka nya dirusak, ditetak sereta dichuri orang ti nadai tanggungpengawa kelebih agi kabel.
Ambika chunto, ku iya, pengawa orang ti netak kebel ke bisi ba tiang telekomunikasyen udah tentu meri penanggul enggau ngeruga kereban telekomunikasyen ba kandang endur ti bekaul.
“Chunto, taun nyin kemari tiang telekomunikasyen di
Kampung Paya Mebi angus, tu udah ngeruga kereban telekomunikasyen laban tiang nya nyadi ‘collector’ tauka pengumpul, reti nya ia nyadi pengumpul sereta nganjung isyrat ngagai semua tiang bukai ba kandang endur ngelinggi nyentuk ke Bau, sereta tu udah ngeruga kereban telekomunikasyen.
“Nya alai, opis menteri aku begulai enggau ejensi sereta raban ti bekaul udah bejalaika atur kena nagang pekara nya awakka nadai agi nyadi vandelisme ti baka nya laban vandalisme ti ngepun ngeruga kereban.
“Ambika chunto ari sukut telekomunikasyen, reti ia penyambung internet nya deka tekeruga sereta rayat enda nemu lebuh nyadi vandalisme tu nyadi, rayat ringat sereta selalu iya nyadi taga (disalah) sapa?.” ku iya seraya madah nya siti ari pengerugi ti ulih nyadi ba rayat ti amat begunaka kereban internet kelebih agi bala nembiak kitai ari sukut belajar.
Lebuh bejaku ba pengerami nya, Julaihi madahka ari baruh Kluster Transformasyen Digital PCDS 2030, opis menteri iya diberi tanggungpengawa ngerembai sereta ngenegapka infrastruktur digital kena nyukung juluk perintah Sarawak nyapai status Wilayah maju enggau bepenatai pemisi tinggi ba taun 2030 belalauka teknologi digital.
ku iya, entara taga besai ari baruh kluster nya, iya nyendiaka bungkur internet ngagai 99 peratus ruang bilik di Sarawak sereta nyendiaka servis online ngagai semua servis perintah.
“Naka suku ke-4 2023, Sarawak udah ngerikodka 78.8 peratus bungkur internet. Bepelasarka nama ti udah dijapai diatu, kitai ba laluan positif ba pengawa nyendiaka 100 peratus bungkur internet lebuh manggai 2030,” ku iya.