Sarawak deka nyadi pengemeran industri minyak, gis ti pemadu beguna: Abang Johari
KUCHING: Sarawak deka nyadi ‘pemain’ pemadu beguna dalam industri minyak enggau gis kelebih agi maya dunya berengkah berubah ari ‘bahan api’ fosil ngagai pun pemisi ti ulih dikena baru sereta kurang karbon.
Premier Sarawak Datuk Patinggi Tan Sri Abang Johari Tun Openg madahka, ungkup tuju nya Sarawak ukai semina deka terus bebendar nuju ngagai energi gadung begulai enggau bakih dagang asal baka Petronas enggau Shell, tang mega nempa kerejasama enggau ‘pemain’ tauka pengemeran industri ari luar menua.
“Siti pekara ti deka dipadah aku ditu, iya nya Sarawak seruran deka nyadi ‘pemain’ pemadu beguna dalam industri minyak enggau gis lebih agi diatu, berubah energi benung nyadi, dunya berubah ngagai energi ulih dikena naru sereta kurang karbon,” ku iya.
Iya madahka pekara nya maya bejaku ba ‘Majlis Menandatangani Kontrak Peruntukan Kejuruteraan, Perolehan dan Pembinaan (EPC) bagi Kerja-Kerja Pembinaan Struktur Tetap Luar Pesisir untuk Projek Pemampatan F6 VLAP milik Sarawak Shell Berhad antara Sarawak Shell Berhad dan Brooke Holding Sdn Bhd’, ditu, kemari.
Mandal Presiden Kanan Upstream Malaysia & Country Chair Shell Malaysia Siti Hurrairah Sulaiman nyain kontrak nya ngarika Sarawak Shell Berhad, sereta Brooke Holding Sdn Bhd diarika Deriktor iya, Dato Sri Wan Lizozman Wan Omar.
Abang Johari madahka, Petroleum Sarawak Berhad (PETROS) deka nempa kerejasama enggau kompeni Mubadala, sebuah kompeni minyak enggau gis ti dipenggi perintah Abu Dhabi.
Kelimpah ari nya ku iya, Sarawak Energy Berhad (SEB) deka nempa ‘joint venture’ enggau MASDAR, pengepun teknologi gadung ti mega dikeempu perintah Abu Dhabi.
“Maya aku enggau libat urus tauka dalam COP-28 (Persidangan Perubahan Iklim Pertubuhan BangsaBangsa Bersatu di Dubai ari 30 November 2023 ngagai 13 Disember 2023), kitai numbuhka kerejasama ngelui ari bakih asal kitai.
“PETROS deka bekerejasama enggau Mubadala, kompeni minyak enggau gis ti dikeempu perintah Abu Dhabi enggau SEB sereta MASDAR.
“Tu singkang kitai ke mua kena ngemayuhka pun pemisi energi enggau duit dalam timpuh berubah energi ngagai bahan api fosil ngagai energi ulih dikena baru,” terang iya.
Abang Johari madahka, diatu PETROS udah dichiri nyadi ‘pengagregat’ gis Sarawak pengudah Rang Undang-Undang (RUU) Pengagihan Gas (Pindaan) 2023 dikemendar ba Kunsil Nengeri (DUN) ba bulan November taun nyin kemari.
“Kitai deka beterima kasih ngagai perintah besai, bekaul enggau undang-undang tu, kitai diatu penyadung tunggal gis di Sarawak.
“Aku ngarapka kolaboratif entara pengemeran industri minyak sereta gis enggau perintah Sarawak deka meri awak siti kerejasama bestruktur ditumbuh enggau kuasa ari baruh perintah nengeri,” ku iya.
Bejaku baru iya madahka, perintah Sarawak nengah PETROS deka terus bekerejasama enggau Petronas sereta Shell ba pengawa nuju ngagai pemansang energi ti meruan sereta gadung.
Ngenang pengerami nya, Abang Johari madahka, nya siti agi penyulut ti ngemegah ati kompeni dikeempu Sarawak, Brooke Holding Sdn Bhd lebuh sekali agi bulih kontrak ari Shell, iya nya EPC.
“Nengah sempekat kunterik tu, aku meri terima kasih ngagai Shell laban meri projek tu ngagai Brooke Holding. Siti testimoni pengarap ari Shell ngagai kompeni menua tu sereta kerejasama rat entara dua entiti tu.
“Aku ngarapka kontrak projek tu deka ngenegapka agi teknologi sereta chara projek tu dipejalaika Brooke.
“Aku dipadahka, tu projek ke-15 entara Brooke enggau Shell, aku pechaya deka bisi (projek) ti ke-16, 17, 18, 19 enggau ke-20 tauka lebih ari nya,” ku iya seraya ngarapka projek nya ulih tembu nitihka timpuh, ungkup belanja ti ditetapka enggau ti pemadu beguna, likun.