Sukung apai indai nentuka pemujur program bantu ai tusu enda bebayar ungkup nembiak
KUCHING: Sukung ari semua orang kelebih agi apai indai enggau diri sebilik amat beguna dikena ngemujurka program bantu ai tusu ti enda bebayar ba bala nembiak dikena nentuka pengerai nembiak dikemeratka.
Premier Sarawak, Datuk Patinggi Tan Sri Abang Johari Tun Openg madahka, ngirup ai tusu bisi pemanah ari aspek komposesyen nutrisi enggau biokimia.
“Ia amat chukup kena ngisi guna pemun tetiap iku nembiak ti baru ngelala dunya luar nyadi pengering tauka pengetan dirampit penyakit. Nya alai pengawa meri ai tusu ngagai nembiak sekula deka nyamin pengerai fizikal enggau runding.
“Berindik ari pekara nya, sukung ari semua orang kelebih agi apai indai sereta diri sebilik ti bukai nyengkaum pengajar, sida SID (Sabah International Dairies SDN. BHD.), Opis Menteri Pelajar Malaysia enggau Opis Pelajar Nengeri amat beguna kena nyendiaka bantu ai tusu pechuma ngagai bala nembiak,” ku iya.
Abang Johari madahka pekara nya dalam teks jaku iya ti dibacha Menteri Pelajar, Inovasyen enggau Pemansang Penau, Dato Sri Roland Sagah Wee Inn nyerumba bejadi ‘Majlis Pelancaran Sambutan Hari Susu Sekolah Sedunia
Peringkat Borneo: Zon 2 (Sabah B) & Zon 3 (Sarawak)’ ditu, kemari.
Program Susu Sekolah (PSS) mega siti program ti dipejalaika KPM begulai enggau kompeni pengeluar ai tusu ti dipilih. Sabah International Dairies Sdn. Bhd. (SID) udah dichiri nyadi penyendia kena bejalaika Program Susu Sekolah (PSS) bagi Zon 2 (Sabah B) enggau Zon 3 (Sarawak).
Abang Johari bejaku baru, iya arap sereta pechaya peneleba pengelama 40 taun sida SID ulih dikena nempa kerejasama enggau KPM keebih agi sereta Opis Pelajar Nengeri Sarawak sereta Opis Pelajar Nengeri Sabah ba pengawa bejalaika
PSS ungkup nembiak sekula primary ti patut neria bantu nya.
“Ba renggat tu, aku dipadahka kriteria milih nembiak iya nya nembiak sekula primary ti datai ari penatai pemisi ruang bilik iya sepenyampau RM1,169 enggau kurang, iya nya RM 310 per kapita.
“Data tu ngayanka bisi 83,852 iku nembiak di serata Sarawak udah dipilih ba PSS KPM maya sesi sekula 2023/2024,” ku iya.
Iya madah diri temegah ati enggau pekara ti dipejalaika KPM begulai enggau Sabah International Dairies SDN. BHD. (SID) ti nyukung pengawa ngirup ai tusu ba raban nembiak sekula.
“Aku arap bisi penyedar ba raban apai indai iya nya ngirup ai tusu ngena chara eksklusif amat beguna ke pengerai anak sida,” ku iya.
Pengerami ngintu ‘Hari Susu Sekolah Sedunia’ mega siti ari pengeran KPM ngerami guna energi tiap renggat ti bejalaika PSS ti dipejalaika sereta enggau Rancangan Makanan Tambahan (RMT).
Hari bulan kena 24 September tiap taun udah digazet nyadi hari bulan ngintu ‘Hari Susu Sekolah Sedunia’. Maya tu, mayuh aktiviti diatur ba renggat sekula ti enggau tuju meransang ualh ngirup ai tusu ba raban nembiak sekula.