Lidam ngarapka projek nyeruri Klinik Pengerai Nanga Bangkit, Nanga Tekalit lengkas dipejalaika

Kaban Kunsil Nengeri (ADUN) Katibas Lidam Assan ngarapka projek nyeruri Klinik Pengerai di Nanga Bangkit enggau Nanga Tekalit ulih digaga enggau lengkas.

Lidam madahka, dua buah klinik nya rumah lama ti digaga ngena kayu.

Nya alai, enggau bebendar iya madahka, kereja nyeruri dua buah klinik pengerai nya patut dipejalaika enggau lengkas laban tebal agi kayu udah repuk.

“Fizikal rumah (klinik pengerai nya) ti digaga ngena kayu tebal agi udah repuk, enggau udah tentu enda nitihka taga perintah dalam meri servis pemadu manah kelebih agi pengelantang tauka penyamai ngagai rayat ti deka begunaka servis,” ku iya lebuh ditelefon, ensanus.

Kelimpah ari nya, Lidam ngarapka Opis Menteri Pengerai Malaysia (KKM) nyendiaka lebih mayuh fasiliti baka kuaters endur diau, akses internet enggau mega ambulans sungai, iya nya perau panjai awakka bisi dikena maya penusah ngenyit.

“Kitai mega minta ngambika sistem solar dipasang ba Klinik Pengerai Nanga Chemanong sereta fasiliti

bukai ti bekaul enggau nyaga perubat pengerai,” ku iya.

Ku iya, Perintah Penyerakup nengah KKM patut beratka pengawa nambahka kapasiti fasiliti servis pengerai dikena nentuka ulih akses ngagai fasiliti pengerai ti sebaka kelebih agi peranak di menua pesisir.

Ia mega setipak enggau reformesyen ti dipejalaika dalam timpuh 15 taun nengah ubah besai ba pengawa ngenegapka servis nyaga

pengerai.

Ngenang silik, Lidam madahka, projek nyeruri sebuah klinik pengerai nya begunaka belanja urung RM400,000.

Hari Satu apin lama, Sapit Menteri Pengerai Dato Lukanisman Awang Sauni madahka KKM deka nyeruri enggau nambahka pemanah klinik pengerai menua pesisir ba bagi menua Kapit taun tu.

Ku iya, Sarawak udah diungkupka

belanja sepenyampau RM19 juta dikena ngemanahka agi klinik pengerai menua pesisir ari baruh program Bitara Madani.

Sepenyampau RM2.7 juta deka dikena ngemanahka agi enam klinik pengerai di bagi menua Kapit.

Klinik nya nyengkaum Klinik Pengerai Nanga Ibau, Nanga Tekalit, Long Busang, Nanga Bena, Nanga Melinau enggau Klinik Pengerai Nanga Bangkit.

NGABAS: Lukanisman (enam ari kiba) maya nemuai seraya bejalaika pengawa ngagai Klinik Pengerai Nanga Tekalit kena Hari Satu. Sama bisi datai Lidam (lima ari kiba).