Sarawak ngenukuka ukui ti diinang mesti dituchuk vaksin anti-rabies

SIBU: Pengawa nuchuk vaksin anti-rabies ungkup ukui di Sarawak diatu siti pekara ti mesti digaga.

Menteri Industri Pemakai, Komoditi enggau Pemansang Kandang Menua Dato Sri Dr Stephen Rundi Utom madah, iya udah nyain lalau tauka jaku tangkan vaksinasyen antirabies ari baruh Seksyen 40 (1) Ordinan Pengerai Mensia Mayuh Veterinar 1999.

“Ari baruh seksyen 40 (1) Ordinan Pengerai Mensia Mayuh Veterinar 1999, semua ukui di nengeri tu patut dituchuk vaksin enggau dos penyungkak ninting taun.

“Sida ti ngempu ukui patut ngembuan tanggungpengawa nentuka jelu tupi sida dituchuk vaksin enggau vaksin anti-rabies.

“Sebarang pengempu tauka orang ti nginang ukui ke enda nuchuk jelu tupi vaksin ulih kena tinggang ukumnyentuk RM2,500,” ku iya nengah siti penerang.

Ku Rundi madah, ukui ti udah udah bisi kena rampit virus rabies lalu bedau dituchuk vaksin deka ‘ditindukka’.

Nitih ku iya, Opis Servis Veterinar (JPV) Sarawak begulai enggau raban Immune Belt Enforcement Team, Unit Pengelikun enggau Penerit adat Sarawak (UKPS) diatu benung chakah ngatur program vaksinasyen anti-rabies di selampur Sarawak.

Kelimpah ari tu, iya mega madahka iya nya mensia mayuh ulih bulih vaksin antirabies ukui enggau enda bebayar ba sebarang opis veterinar perintah maya jam orang gawa enggau program nuchuk vaksin ti bisi dipadahka ninting maya di akaun rasmi Facebook JPV Sarawak.

“Ba taun tu kami ngeletakka juluk deka nuchuk vaksin nyentuk ngagai 50,000 ukui.

“Aku mega ngenukuka Bagi Menua Kuching enggau Bintulu iya nya kandang menua berampit rabies berindik ari bisi virus rabies ditemu.

“Bisi 12 iku ukui udah diperesa positif di Kuching (8), Padawan (1), Bau (1) sereta Bintulu (2) ari 16 sampel ke udah digumpul.

“Semua ukui ke diperesa tu iya nya ukui ti bekedayau lalu nadai dituchuk vaksin. Nya alai, aku deka ngelalau mensia mayuh ngambika bejejaga lalu ke klinik enggau lengkas, nyema bisi kena ketup,” ku iya.

Dalam penerang ti sama, Rundi madahka Opis Pengereai Nengeri Sarawak ngerikodka 16 kes pemati taun nyin kemari ari 18 kes rabies ti nyadi ba mensia.

Ku iya, penyampau kumulatif kes rabies mensia diatu bisi 73, enggau 66 kes pemati, kenyau ari bulan Julai 2017.

Beserimbai enggau tu, Dr Rundi ngelalai sida ti ngempu ukui ngambika enda nejuka ukui sida bekedayau ba jalai alun laban ulih kena tinggang ukum nyentuk RM5,000 ari baruh Seksyen 37 (3), VPHO 1999 tauka nyentuk RM2,500 ari baruh Seksyen 37 (4).

Sida ti nginang ukui mesti nyaga jelu tupi sida tu enggau ngurung dalam kandang endur ti betutup ti enda ulih endur ukui nya ngelarika diri.

Iya mega nyemetak madah, raban ti bekuasa ulih nangkap lalu ngurung sebarang ukui ti diinang ke enda nitihka atur raban ti bekuasa kandang menua.

“Bulih lisin ukui tu endang patut ari baruh undangundang mit Raban Bekuasa Kandang Menua (Lisin enggau Nyaga Ukui), 2018. Pengempu ukui ti nadai lisin ulih kena ukum nyentuk RM5,000.

“Ukui ti bisi lisin enggau vaksin rabies deka diberi mikrochip ngambika ulih ditemu enggau meruan. Ukui ukai beranak patut disunat tauka diputung dikena nyeliahka ari beranak dalam nagang populasyen ukui di nengeri tu. Raban ti bekuasa deka bejalaika pengawa meresa ari rumah ke rumah dalam nentuka atur ti ditetapka tu dititih berengkah Februari 2024,” ku iya madah.

Beserimbai enggau tu, lumur telefon ‘hotline’ JPV Sarawak rabies iya nya 016 255 7267 lalu lumur keterubah suba 016 205 1111 enda dikena agi.