‘Hari Susu Sedunia’ kelai KPM meri basa ngagai raban ti bejalaika PSS

Pengerami ngintu ‘Hari Susu Sekolah Sedunia’ mega dipeda ngayanka ka Opis Menteri Pelajar Malaysia (KPM) ngerami pengereja pengawa ba tetiap renggat raban ti bejalaika pengawa dalam Program Susu Sekolah (PSS) ti dipejalaika sereta enggau Rancangan Makanan Tambahan (RMT).

Direktor Pelajar Nengeri, Datu Dr Azhar Ahmad madahka, pengerami ngintu Hari Susu Sekolah Sedunia iya nya siti aktiviti ti diintu tiap taun kena nambahka penyedar pasal pemesai guna pemanah pemakai nembiak mit di menua tu.

“Program tu dipejalaika ungkup nembiak ti datai ari ruang bilik seranta ti bepenatai pemisi ti ba tikas status sosioekonomi ti baruh awakka bulih pemakai ti engkeman ke pengerai maya ba sekula.

“Program tu mega tuju iya ngangkatka tikas pengerai enggau pemakai nembiak sekula primary ngambika bulih pemakai ti manahka pengerai maya ba sekula,” ku iya.

Iya madahka pekara nya lebuh bejaku ba ‘Majlis Pelancaran Sambutan Hari Susu Sekolah Sedunia Peringkat Borneo: Zon 2 (Sabah B) & Zon 3 (Sarawak)’ ti dipenyadi Menteri Pelajar, Inovesyen enggai Pemansang Penau, Dato Sri Roland Sagah Wee Inn ti ngarika Premier Sarawak Datuk Patinggi Tan Sri Abang Johari Tun Openg ditu, kemari.

Nambah nya Azhar madahka, tuju program nya mega dikena ngangkatka tikas pengerai enggau pemakai nembiak sekula primary dikena nentuka penumbuh fizikal, pengerai runding enggau lebih agi pengerai nembiak sekula majak manah.

Ku iya, kelimpah ari nya PSS mega tuju ia dikena meransang nembiak ngirup ai tusu ba renggat tumu.

PSS mega siti program ti dipejalaika KPM begulai enggau kompeni pengeluar ai tusu ke dipilih.Sabah International Dairies Sdn Bhd (SID) udah dichiri nyadi penyedia ungkup PSS Zon 2 (Sabah B) enggau Zon 3 (Sarawak).

Kelimpah ari nya, Penyanding Penemu Progam Susu Sekolah SID Datuk DeLeon Quadra@Kamal Quadra lebuh bejaku madahka, lebuh PSS Opis Menteri Pengerai Malaysia dipejalaika ba taun 1983, SID mega ngambi bagi nyendiaka ai tusu ngagai sekeda nengeri di Semenanjung Malaysia enggau Sarawak.

PSS dipejalaika di serata menua tang nadai ba Sabah laban Sabah bisi program nya kediri empu ba sekula maya nya suba, ti diberi nama Mat Pintar.

“SID udah diberi kontrak ari baruh KPM ti nyendia enggau nganjung ai tusu ke sekula di nengeri Sabah, Sarawak, Negeri Sembilan, Melaka, Selangor enggau Labuan ari taun 2011 ngagai tau 2017.

“Laban dua bansa program ai tusu sekula dipejalaika sereta di nengeri Sabah, Program Susu Sekolah Percuma Negeri Sabah dikelala enggau nama Susu Mat Pintar diketu ba taun 2016 sereta diganti ngena Program Susu Sekolah ti dipejalaika KPM,” ku iya.

DeLeon madahka, ba taun 2020 PSS udah dipejalaika baru sereta penerima PSS iya nya semua nembiak sekula primary ke datai ari ruang bilik ti umang.

Terang iya, tiap iku nembiak diberi ai tusu kutak UHT 200ml tusu penuh krim ti nadai rasa ninting hari.

“Meri ai tusu penuh krim ti nadai rasa iya nya setipak enggau polisi perintah deka ngurangka ngambi gula ti mayuh nyentuk ngeruga pengerai,” ku iya.