Nembiak diperansang nampung pelajar ngagai institusyen pelajar tinggi
BINTULU: Raban nembiak patut bisi perambu deka nampung pelajar ngagai tikas lebih tinggi sereta ngulihka pengelandik ti ulih napi peminta guna makit kereja kelebih agi ba bidang pengelandik di nengeri tu.
Kaban Kunsil Nengeri (ADUN) Tanjong Batu, Johnny Pang madahka, nengeri tu diatu benung bebendar ngemujurka Strategi Pemansang Pengudah COVID-19 (PCDS) 2030) serata Sarawak kelebih agi di Bintulu ti benung deras enggau chakah mansang.
“Nya alai dalam pemansang nya begunaka orang gawa sereta tiap bidang kereja nya begunaka orang gawa ti bisi sekeda tikas pengelandik,” ku iya lebuh bejaku ba ‘Majlis Anugerah Kecemerlangan Prestasi Sekolah Menengah Kebangsaan (SMK) Bandar Sesi 2023-2024’ ba sebuah restoran ditu, kemari.
Berindik ari pekara nya iya meransang raban nembiak diatu ngambika nampung pelajar ngagai tikas lebih tinggi nyentuk ke institusyen pelajar luar menua, sereta udah tembu belajar patut pulai gawa kitu
lalu sama besaup ngemajuka Sarawak.
Kelimpah ari nya, iya bepenemu pengajar ti nyadi raban di mua dalam bidang pelajar mega bejalaika tanggungpengawa beguna dalam ngajar tauka ngiring nembiak sereta nempa mensia ti mujur jemah ila.
“Sukung enggau iring pengajar nyadi peransang ngagai bala nembiak terus bebendar enggau teulihka penyulut kelebih agi dalam bidang akademik,” terang iya.
Bekaul enggau pekara nya, Pang meri tabi puji ngagai
nembiak ti nerima gelar tauka perais nya seraya ngarapka sida terus bebendar ngulihka pemujur jemah ila ti ukai semina dalam bidang akademik tang mega kokurikulum.
“Tabi puji mega ngagai apai indai ti seruran meri peransang enggau sukung ngagai anak sida sereta terus maju dalam bidang pelajar,” ku iya.
Sama bisi datai Prinsipal SMK Bandar, Rubiah Taip enggau Yang Dipertua Gerempung Apai Indai enggau Pengajar (PIBG) SMK Bandar, Elvin Wong.