MIPD numbuhka komiti pematau infrastruktur enggau aset
Opis Menteri Infrastruktur enggau Pemansang Penyangkai Kapal (MIPD) deka numbuhka komiti kena ngatur pemar ti ditapi maya ngaduka jalai nyengkaum jalai feri meraka.
Sapit Premier Datuk Amar Douglas Uggah Embas madahka, penumbuh Komiti Pematau Infrastruktur enggau Aset nya setipak enggau pengeran opis menteri dalam ngenegapka prinsip tadbir urus ti manah enggau integriti kena nentuka ulih meri servis ti pemadu manah.
“Aku udah meri pengawa ngagai sapit aku (Datuk Aidel Lariwoo) ngambi numbuhka Komiti Pematau Infrastruktur enggau Aset, ti deka matau silik sebarang bagi pemar enggau isu ti ditapi maya ngaduka jalai, nyengkaum feri.
“Feri iya nya siti agi pemar ti ditapi kitai, kelebih agi maya musin landas, diatu,” ku Uggah, ti mega Menteri ti nyaga MIPD.
Iya madahka, komiti nya diberi mandat nyendiaka ripot ba asil keterubah ia dalam timpuh enam bulan, kelebih agi maya manggai bulan Jun pengudah Gawai Dayak.
“(Direktor Opis Kereja Raya Sarawak Datu) Richard Tajan deka mantaika ripot nya ngagai kami, sereta udah nya aum enggau semua penyedia servis ngambika nemu asil pansik nya.
“Kami komited matau enggau silik asil ti dipejalaika kontrektor, enggau baka ti ditekanka direktor sebedau tu, jaku tangkan deka diberi enti bisi pematut.
“Kami nadai bebagi penemu bejalaika atur enda ngira bagi kontrektor ti enda bejalaika tanggungpengawa sida,” ku iya madahka pekara nya ba ‘Malam Gala Penyelenggaraan Jalan Negeri JKR Sarawak’ ti keterubah diatur ditu, malam Hari Tiga.
Uggah mega bejadi Sistem Pengurusan Perisikan Jalan Raya (PRIMS), sebengkah aplikesyen mudah dipindah ti enggau tuju kena nyambungka penyikar meri servis.
“Aku ngarapka ia chukup pintar dikena meri timbal ke diguna kami. Tu kena ngelala bagi transformesyen digital kena nyambungka penyikar meri servis ngagai rayat.
“Aku mega deka ngansak enggau meransang semua orang ngambika terus ngerembai enggau nyerungkai chara ngangkatka servis nengah chara ngaturpengawaenggauinovatif sereta pemansang teknologi, nyengkaum‘kecerdasanbuatan generatif’,” ku iya.
Nyerumba pengerami tu, bisi beberapa gelar tauka perais udah diberi ngagai penyedia servis ungkup taun 2022 ngagai 2023 ari baruh ‘Kontrak Berasaskan Prestasi bagi Pengurusan Jangka Panjang dan Penyelenggaraan Jalan Negeri di Sarawak’ enggau ‘Anugerah Keadaan Jalan Bahagian’ ngagai Opis JKR Bahagian Bagi Menua.