Cherita asal pasal budaya, sosial, ajar manah etnik Sarawak digaga nyadi koleksyen bup begambar
KUCHING: Bisi lima koleksyen cherita asal nyengkaum semua entik di Sarawak ti ngundan senentang budaya, sosial enggau ajar manah udah digaga nyadi siti koleksyen bup begambar.
Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah madahka, koleksyen bup ‘Sarawak Folktales For All’ nya mantaika cherita ari etnik Iban, Bidayuh, Melayu, China enggau Punan.
Nitihka iya, tuju nyelak bup begambar nya kena nempa pemereti ati ti dalam kelimpah ari ngetan sereta bebasaka budaya ba mayuh bengkah etnik.
“Nya alai, bup tu disadung ngagai 1,254 sekula primari nyengkaum 223 sekula primari China enggau 211 librari di serata nengeri tu.
“Tuju ia kena nentuka tiap institusyen pelajar enggau librari bisi akses ngagai reta budaya tu,” ku iya.
Iya madahka pekara nya maya pengerami bejadi bup ‘Sarawak Folkstales For All’ ba Bilik Baum Mulu, Bangunan Baitulmakmur ll, Petra Jaya ditu, kemari.
Abdul Karim ti mega Menteri Nembiak, Lumba enggau Main, sereta Pemansang Orang Dagang bejaku baru madahka, pengawa nyelak bup nya ngena Dana Mudahcara Warisan, Seni dan Budaya taun nyin kemari.
Bup nya ku iya, ngayanka cherita ari cherita asal ti bekaul silik enggau tisih, pechaya, enggau asal tiap raban etnik.
“Sarawak bisi 34 raban etnik ti ulih bebaik enggau nyadika penerang sereta teladan ngagai pemanah mayuh macham bansa, lalu bekunsi cherita asal nyadi jematan tauka penyambung awakka kitai ulih nyerungkai budaya tiap bansa kelimpah ari nempa pemereti ati,” ku iya.
Abdul Karim nerangka, entara koleksyen cherita baka ‘Baka Kumang Nupi Sawa’ iya nya cherita dalam komuniti Iban ti bisi tisih teladan kediri empu.
Kelimpah ari nya, cherita ari komuniti Bidayuh ‘Widow and The Colourful Clothes frog’ sereta cherita ari komuniti Melayu, ‘Udin dan Ikan Patin Berubah’.
Cherita komuniti Punan, ‘Modi dan Batu Ajaib’ pasal sayauka rampa menua enggau tisih ngamatka semaya, sereta cherita rayat China iya nya ‘Pulau Datuk Kong,’ ku iya.
Dalam komitmen nyaga pesaka asal, iya madahka, iya nya Pulau Datuk Kong benung dalam proses digazet nyadi pesaka asal taba ari baruh Ordinan Warisan Sarawak 2019.
“Pulau tu ba tengah Batang Kemena sereta deka dijaga enggau dikemanahka agi nyadi palan dagang temuai pesaka asal,” terang Abdul Karim.
Berebak enggau tu iya madahka sepenyampau RM10 juta ungkup belanja tiap taun ari baruh Opis Menteri Dagang Temuai, Industri Kreatif enggau Seni Pemerindang kena ngemansangka penumbuh industri kreatif di Sarawak.
“Ia ungkup Dana Mudahcara Warisan, Seni dan Budaya ti ukai semina kena nyukung gerempung enggau organisesyen ti bekaul enggau seni, budaya enggau pesaka asal ngatur aktiviti enggau program aja, tang mega dikena nempa penumbuh industri kreatif Sarawak.
“Ngena Dana Mudahcara Warisan, Seni dan Budaya, kami nyukung peminta ari individu ti bisi penau, gerempung ukai dikuasa perintah (NGO) enggau komuniti menua tu,” ku iya.
Ku iya, bantu tauka pemeri sida ti bekaul enggau pengeluar, promosyen, penyadung enggau komersial produk pesaka asal bejalaika tanggungpengawa nyaga enggau ngetanka pesaka asal budaya di Sarawak.
Sama bisi datai Sapit
Menteri Dagang Temuai, Industri Kreatif enggau Seni Pemerindang, Datuk Snowdan Lawan; Deriktor Dewan Bahasa dan Pustaka (DBP) Pampang Sarawak Abang Haliman Abang Julai enggau temuai bukai.