Perintah Sarawak nyendiaka subsidi RM1,000 setaun
Subsidi ungkup nyaga, pelajar tumu nembiak mit ba IPAKK bebayar, berejista kena ngelempungka tating belanja apai indai
KUCHING: Perintah Sarawak nyendiaka subsidi yuran nyaga enggau pelajar tumu nembiak mit sepenyampau RM1,000 setaun kena mantu ngelempungka tating belanja apai indai di nengeri tu.
Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah madahka, ruang bilik bepenatai pemisi RM7,000 enggau ke baruh ulih sereta patut minta subsidi nya ungkup nembiak mit ti dianjung ngagai institusyen pelajar tumu nembiak mit (IPAKK) bebayar enggau berejista ari baruh opis menteri.
“Bala apai indai ti nganjung anak ke IPAKK bebayar, sida ulih minta subsidi tu enggau penyampau RM1,000 ke tiap iku anak.
“Peminta tu ulih dipinta berengkah ari 11 Mac ngagai 1 April ti deka datai, ngena chara online,” ku iya maya baum pengarang berita pengudah nyadi chairman
Aum Majlis Pembangunan Awal Kanak-Kanak Sarawak (MPAKS) ba opis iya di Ringkat 8, Bangunan Baitulmakmur II ditu, kemari.
Sama bisi datai, sapit iya,
Datuk Rosey Yunus enggau Sekretari Opis Menteri iya Noriah Ahmad.
Kelimpah ari subsidi nyaga enggau pelajar tumu nembiak mit, perintah Sarawak ku Fatimah
mega neruska inisiatif Geran Tahunan Khas (GTK) taun tu ungkup pengemeran IPAKK berejista.
Ku iya, sepenyampau RM14 juta diungkupka perintah Sarawak kena bejalaika inisiatif GTK taun tu sereta tiap IPAKK berejista deka nerima RM5,000.
“Geran tu kena mantu pengemeran IPAKK berejista nambahka kualiti servis nyaga, nyeridi enggau ngajar tumu nembiak mit sida ari sukut pemakai ti meri pengerai enggau diet, sereta belajar ti ngerindu ati.
“Kelimpah ari nya, geran tu mega ulih dikena bejalaika program pemansang profesionlisme pengajar tauka penyaga ba IPAKK berejista kelimpah ari program begulai enggau apai indai,” ku iya.
Nambah nya, kena nambahka kualiti pelajar tumu nembiak mit, semua pengajar enggau penyaga ari baruh SeDidik Sdn Bhd, dikeempu perintah nengeri enda tau enda bisi Diploma Pendidikan Awal Kanak-Kanak ba taun 2025.
Naka ke diatu ku iya, semina 6.75 peratus pengajar enggau penyaga SeDidik ti apin bisi Diploma Pendidikan Awal Kanak-Kanak ba lima Tadika Penan enggau agi ngambi kus sereta dipelaba tembu belajar nya ba taun 2025.
Fatimah mega meransang pengajar enggau orang ti ngibun nembiak mit ba IPAKK peribit nyikap diri ngena Diploma Pendidikan Awal Kanak-Kanak baka di IPAKK perintah.
Maya baum nya kemari mega netapka Konvensyen Antarabangsa Prasekolah deka diatur berengkah ari 20 ngagai 29 September 2024, ngena rambai jaku ‘Inclusivity.’
“Peminta tu ulih dipinta berengkah ari 11 Mac ngagai 1 April ti deka datai, ” ngena chara online. Dato Sri Fatimah Abdullah Menteri Pemansang Indu, Nembiak Mit enggau Pengelantang Komuniti