Sarawak naga 99 peratus nembiak mit akses PAKK 2024
KKLA ti baru ditinda baru, dipelaba tembu ujung taun 2027
KUCHING: Sarawak naga 99 peratus nembiak mit di nengeri tu bulih akses pelajar tumu nembiak mit (PAKK) taun tu sebedau nampung ngagai sekula formal.
Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah madahka, taun nyin kemari 98.71 peratus nembiak mit ti masuk sekula Primari 1 Sesi 2023/2024 bulih akses pelajar tumu nembiak mit.
Ku iya, nya ngayanka asil ti manah ungkup Sarawak enti dibandingka enggau renggat nasional iya nya 88.8 peratus.
“Kitai deka nambahka agi akses pelajar tumu nembiak mit ari 98.71 peratus ngagai 99 peratus taun tu.
“Kena ngamatka tuju nya, siti komiti khas deka mansik dini ti agi kurang tauka begunaka akses pelajar tumu nembiak mit awakka kitai ulih nambahka 99 peratus taun tu,” ku iya.
Iya madahka pekara nya maya baum pengarang berita penguday nyadi chairman
Aum Majlis Pembangunan Awal Kanak-Kanak Sarawak (MPAKS) ba opis iya di Tingkat 8, Bangunan Baitulmakmur II ditu, kemari.
Aum nya mega digulu Sapit Menteri Pemansang Indu, Nembiak Mit enggau Pengelantang Komuniti, Datuk Rosey Yunus; enggau Sekretari Mendam Opis Menteri nya, Noriah Ahmad.
Bejaku baru, Fatimah madahka, taga Sarawak iya nya 100 peratus nembiak mit di nengeri tu nerima pelajar tumu nembiak mit ba taun 2030.
Kena ngamatka taga nya ku iya, MPAKS bekerejasama enggau ejensi baka SeDidik Sdn Bhd; Opis Pelajar Nengeri Sarawak; Opis Pemansang Komuniti (KEMAS); Opis Penyerakup Menua enggau Integresyen Nasional (JPNIN) enggau Gerempung Pengemeran Tadika (AKO) kena nambahka akses ngagai pelajar tumu nembiak mit di nengeri tu.
Naka 27 Disember 2023 ku iya, bisi 3,033 Institusyen Pelajar Tumu Nembiak Mit (IPAKK) di serata Sarawak, lalu 2,801 ari penyampau nya, iya nya tadika enggau 232 taska.
Fatimah ti mega Chairman MPAKS mega madahka, opis menteri taun tu deka terus ngenegapka program pelajar tumu nembiak mit ke udah bisi, kelimpah ari meri kelala program baru.
Ku iya, entara ti dikemeratka taun tu iya nya nempa karakter enggau gaya tauka personaliti nembiak mit nengah program baka Bersih Awal Bersih Akhir (BaBa) asil penemu ari pengawa OSOJI di Jepun.
Nengah program nya ku iya, nembiak mit diajar nentuka ruang tauka alai aktiviti tauka belajar beresi enggau kemas maya sebedau enggau pengudah aktiviti dipejalaika.
“Kitai mega deka ngemeratka ‘experiential learning’ di IPAKK, iya nya nembiak diberi awak nyerungkai peneleba nengah aktiviti luar baka nemuai awakka sida belajar ari gaya pengidup kebendar,” ku iya.
SRI AMAN: Projek Klinik Pengerai Lubok Antu (KKLA) ti baru deka ditinda baru ba bulan Julai taun tu pengudah notis abis kontrak diberi ngagai kontrektor lama kena 24 Julai taun nyin kemari.
Sapit Menteri Pengerai Dato Lukanisman Awang Sauni madahka, projek nya dipelaba tembu lebuh manggai ujung taun 2027.
“Nyema sepemanjai timpuh projek tu digaga nadai betapi enggau sebarang penanggul, projek tu dipelabaka kitai ulih ditembuka semua lebuh manggai taun 2027,” ku iya.
Iya madahka pekara nya lebuh bejaku enggau raban pengarang berita pengudah ngabas KKLA ditu, Hari Empat.
Iya ti ngabas nya sebagi ari penemuai seraya bejalaika pengawa iya ngagai fasiliti pengerai di Sarawak.
Nyerumba penemuai nya, iya mega bisi ngungkupka belanja sepenyampau RM500,000 ngagai Klinik Pengerai Engkilili enggau RM600,000 ngagai Klinik Pengerai Nanga Entalau dikena ngaga baru dua buah klinik nya.
Kelimpah ari nya, iya madahka Klinik Nanga Patuh deka diseruri tauka dikemanahka agi , sereta Klinik Nanga Stamang deka ngena sistem solar enti udah tembi diseruri.
Nyempulang penemuai iya, Kaban Parlimen Lubok Antu Roy Angau Gingkoi; Pegawai Tadbir Khas Sapit Menteri Dagang Antarabansa, Industri enggau Pemeranak Puku Jack Meredan enggau Pegawai Menguasa KKLA Dr Alex Yap ShiiWei.