Sida ti tabin patut diperesa enggau jampat tauka tekala nya, amat kritikal deka nentuka nadai dirampit COVID-19, ku Uggah
KUCHING: Opis Perubat dipinta matau enggau silik pengerai orang ti kena tasah ke diau ba palan pengenduh (PPS) bah di nengeri tu.
Sapit Premier Sarawak, Datuk Amar Douglas Uggah Embas madahka, kelebih agi sida ti tabin patut diperesa enggau jampat tauka tekala nya.
Iya madahka laban amat kritikal deka nentuka sida nadai dirampit COVID-19.
Uggah ti mega Chairman Komiti Penyangga Penusah Ngenyit Nengeri Sarawak (JPBNS) madah ngagai pengarang berita pengudah ngabas orang ti kena tasah bah ba PPS Dewan Millenia enggau Dewan Perpaduan di Debak, Betong kemari.
“Kitai udah tentu enggai agi meda sida betapi enggau penanggul ti nambahka penusah sida,” ku iya.
Iya taja pia gaga ati meda pekara ti udah disediaka mayuh bengkah opis ti bekaul di PPS.
“Aku chukup puas ati enggau kerejasama rat sida dalam nyendiaka pemakai, kereban kena tinduk enggau perengka bukai ti diguna din,” ku iya.
PPS Dewan Millennia diatu bisi 141 iku ari 39 ruang bilik, lalu di PPS Dewan Perpaduan bisi 223 iku ari 71 ruang bilik.
Sida ti kena tasah nya ari genturung pendiau iya nya
Kampung Babu, Kampung Bungey enggau Kampung Lalang ditu.
Ngenang penanggul bah ditu, Uggah ngarapka ia enda nyadi agi enti projek mitigasyen bah ti benung digaga diatu udah tembu ila, iya nya udah manggai sembilan peratus tembu.
“Kami deka berandau enggau Opis Parit enggau Entali Ai ngambika ngeyampatka pengawa nembuka projek kenyau ia berengkah digaga pengudah pandemik COVID-19,” ku iya.
Ngenang bah ti nyadi ba nengeri tu, iya madahka empat PPS udah disediaka.
Nya nyengkaum dua di Bagi Menua Bintulu alai lapan ruang bilik di kandang mengeri ti betapi penusah kudi apin lama enggau di Sungai Muput, Anap di
Tatau ti bisi 37 ruang bilik kena tasah bah.
“Aku udah minta komiti (JPBNS) kitai ba renggat bagi menua enggau pelilih menua ngambika dibuka tauka diaktif kenyau ari ensanus kena betapi sebarang pekara nyadi maya musin landas taun tu.
“Di Sarawak, musin bah suah ia dipelaba lebuh manggai ujung bulan Januari ngagai Februari. Diatu kitai betapi enggau bah.
“Aku ngarapka sida ti diau ba kandang endur ti risiko bah ulih nerima sebarang jaku tangkan ti minta sida pindah kena nyaga pengelikun diri empu, tang naka ke diatu kami nadai nerima sebarang ripot pasal sida enggai dipindah.” ku iya.
Uggah maya ngabas PPS disempulang Kaban Parlimen Betong Dr Richard Rapu enggau ADUN Saribas Datuk Mohd Razi Sitam.
Kelimpah ari nya iya mega bisi ngabas SK St John iya nya meresa tanah tusur ba tebing semak enggau rumah buding tauka asrama.
Lebih 20 nembiak ti diau ba buding nya diatu udah dipindah ngagai rumah bukai ba kandang endur tinggi sekula nya ti ba sepiak Sungai Layar.
Uggah madah iya udah minta JKR nganggarka belanja ngaga tembok benteng sepengelangkas ke ulih kena nyelamatka rumah buding.
Kitai udah tentu enggai agi meda sida betapi enggau penanggul ti nambahka penusah sida.
Datuk Amar Douglas Uggah Embas Sapit Premier Sarawak