Sarawak engka nyendiaka ‘kelas rayat Sarawak’, ‘kelas ukai rayat Sarawak’ jemah ila
KOTA SAMARAHAN: Sarawak engka nyendiaka pelajar dua kelas iya nya ‘kelas rayat Sarawak’ enggau ‘kelas ukai rayat Sarawak’ jemah ila, ku Sapit Premier Sarawak, Datuk Amar Dr. Sim Kui Hian.
Iya madahka, sida ti dalam ‘kelas rayat Sarawak’ deka ngasaika pengelebih nyengkaum langgur pelajar tinggi pechuma di Sarawak.
“Kitai benung nuju ngagai pemansang menua bansa ‘siti menua, dua kelas’...’kelas rayat Sarawak’ enggau ‘kelas ukai rayat Sarawak’. Nama reti ti dipadahka aku ‘siti menua, dua kelas’?
“(Ambika chunto) ba taun 2025 sida ti dalam ‘kelas rayat Sarawak’ ti belajar ba Universiti Swinburne deka (belajar) pechuma.
“Enti nuan ukai peranak menua (kelas) Sarawak, nuan patut mayar yuran tuisyen belajar ba institusyen pelajar tinggi (IPT) nya.
“Nya deka ngepunka ‘siti menua, dua kelas’,” ku iya lebuh bejalu maya pengerami bejadi ‘Pertunjukan Seni’ niang Chong Liew Syn di Galeri Hoan di La Promenade
Mall ditu, malam Hari Lima.
Bisi datai ngagai pengerami nya, pengari Direktor Hock Seng Lee (HSL) Realty Sdn Bhd Yu Ji, Direktor Galeri Hoan Hoan Kee Huang enggau anak tuai niang Chong, Chong Ken Loh.
Kelimpah ari nya, Dr Sim madahka, pemansang seni enggau budaya Sarawak mega deka nyadi sebagi ari asas tauka pemun ngagai proses nempa menua.
Berindik ari pekara nya, iya meransang kompeni bekaul enggau perintah (GLC) ngambika nyukung artis menua tu.
“Kitai deka ke legasi nya diteruska taja pan diatu engka tusah tang diatu Sarawak dipeda benung bebendar ngemansangka sbuah palan seni ba mengeri besai Kuching kena nyukung raban artis tu.
“Tiap rayat di Sarawak iya nya aset ti ulih sama mai pemansang ngagai nengeri nengah tanggungpengawa diri empu enggau mantu dalam pemansang menua enggau bansa,” ku iya.