Kompeni korporat diperansang meri pemeri ngagai raban begunaka bantu maya pengerami
KUCHING: Kompeni korporat di nengeri tu diperansang seruran meri pemeri ngagai raban ti begunaka bantu kelebih agi maya pengerami.
Datuk Bandar Majlis Bandaraya Kuching Selatan (MBKS) Dato Wee Hong Seng madahka, laban nya ambis nadai ulih ngelempungka pemerat ti diasai sereta meri peluang ngagai raban nya ngasaika pengaga maya pengerami.
Ambika chunto, ku iya, kompeni korporat baka STM Lottery Sdn Bhd (Sports Toto Malaysia) seruran mantu raban begunaka nya ngena chara meri pemeri tiap kali maya pengerami Tahun Baharu China.
“Nya alai, kitai beterima kasih ke inisiatif manah ti dipejalaika Sports Toto Malaysia laban ti mantu sida ti begunaka bantu tu.
“Kitai ngarapka lebih mayuh organisesyen korporat di nengeri tu neladan chara kompeni tu ti meri pemeri enda ngira chara bakani bantu diberi kelimpah ari duit,” ku iya.
Iya madahka pekara nya lebuh bejaku ba pengerami nyuaka pemeri nyerumba Taun Baru China ari Sports Toto Malaysia di Che Hia Khor Uplifting Society ditu, kemari.
Bisi 400 orang tuai ari ruang bilik ti kurang penatai pemisi tauka suntuk di Kuching nerima pemeri angpau enggau hamper nyerumba ngintu Taun Baru China ba pengerami nya.
Berebak enggau tu, Wee ngelalau komuniti ti kurang penatai pemisi tauka suntuk kelebih agi orang tuai ngambika seruran gerai enggau nyaga pengerai diri belama.
“Enda lama agi kitai deka ngintu Taun Baru China, nya alai aku ngarapka orang tuai ti deka ngerami pengerami tu nyaga pengerai diri enggau manah,” ku iya.
Kelimpah ari nya, nengah penerang berita Sports Toto Malaysia madahka, Kimpin Meri Angpau ti udah ba taun ke-37 udah nguntung lebih 18,000 orang tuai ti begunaka sukung tauka bantu nya di serata menua.
Nitihka penerang nya, kimpin nya pengelama enam hari berengkah ari 18 Januari deka diatur ba 50 mengeri serata menua kena meri pemeri ngagai orang tuai beumur 60 taun ke atas ti patut.
Lalu, Kuching iya nya siti ari 50 palan ti dipilih alai ngatur kimpin meri pemeri ti enggau objektif meri peluang ngagai raban nya ngasaika pengaga nyerumba pengerami ti deka datai.
“Program tu tanggupengawa sosial korporat kami (Sport Toto Malaysia) ngagai komuniti ti ngerami TBC.
“Nyentuk diatu, kami udah meri lebih RM25.6 juta ti nguntungka lebih 455,000 orang tuai di sereta menua kenyau penumbuh kimpin pemeri tu ba taun 1988,” ku iya.
Kelimpah ari pemeri maya pengerami, Sports Toto Malaysia mega meri belanja besai tiap taun ngagai Majlis Sukan Negara enggau aktiviti lumba enggau main ti diatur gerempung lumba enggau main menua kena mantu pemansang penau ba lumba enggau main nasional, projek macha enggau kimpin nyaga rampa menua.
Sama bisi datai ba pengerami tu kemari Penolong Pengurus Wilayah-Sarawak STM Lottery Sdn Bhd Henry Liew; Eksekutif Kanan Jualan Kawasan-Kuching A STM Lottery Sdn Bhd Helen Tan Puay Cheng; Eksekutif Kanan (Operasi Jualan) STM Lottery Sdn Bhd Yen Huey Erl enggau Eksekutif Jualan Kawasan-Kuching B STM Lottery Sdn Bhd Florence Loo Yi Yuh.