Tiap ruang bilik kena penusah kudi di Bintulu dibantu RM1,000
BINTULU: Tiap ruang bilik ti kena penusah kudi tauka ribut di bagi menua tu Hari Lima apin lama, deka nerima bantu sepenyampau RM1,000, ku Menteri Dagang Temuai, Seni enggau Budaya, Dato Sri Tiong King Sing.
Iya ti mega Kaban Parlimen Bintulu madahka, tiap ruang bilik nya ila diberi bantu bepelasarka rikod ke bisi dalam Opis Pengelantang Komuniti (JKM) kena ngemudahka pengawa meri pemeri nya.
“Kena ngelancharka pengawa ngagihka bantu tu, Pusat Khidmat Parlimen Bintulu deka ngatur enggau bejadi pengawa meri bantu kena ngelempungka penusah ti diasaika sida ti kena tasah nya,” ku iya.
Tiong madahka pekara nya pengudah iya nyadi chairman aum bekaul enggau penusah ngenyit nyadi di Bintulu ti diatur ba Opis Residen Bintulu ditu, Hari Lima.
Ngena pemeri nya, ku iya, tiap ruang bilik nya ulih meli utai ti diguna lengkas kelebih agi ti jai ketegal kudi tauka ribut balat nya.
Pengudah baum, iya meri awak diri ngabas pengawa meresi enggau nyeruri perabung rumah di Iris Garden
Apartment ti jai.
Tiong berebak enggau tu madah diri deka mai penerang insiden ke nyadi nya ngagai Menteri Besai, Datuk Seri Anwar Ibrahim enggau Sapit Menteri Besai Datuk Seri Dr. Ahmad Zahid Hamidi, ngambika ulih nentuka nama bantu ke patut kelebih agi ari Ejensi Penyangga Penusah Ngenyit Menua (NADMA).
Tiong mega beterima kasih ngagai Sapit Premier Sarawak ti mega Chairman Komiti Penyangga Penusah Ngenyit Nengeri Sarawak (JPBNS) Datuk Amar Douglas Uggah Embas enggau Sapit Sekretari Perintah Sarawak Datuk Buckland Bangik, ti udah enggau lengkas ngeyampatka proses meri bantu ngagai sida ti kena tasah.
“Aku amat beterima kasih ngagai timbal ti chukup lengkas ari Menteri Ekonomi Rafizi Ramli , ti ulih meretika pekara ti nyadi enda disadang, lalu udah enggau lengkas ngemendarka ungkup belanja kena ngepunka proses meresi enggai nyeruri perabung apartment nya enggau kandang endur pendiau bukai ngambika sida ti kena tasah nya ulih jampat pulai ngagai rumah diri empu,” terang iya.