Jalai Sultan Tengah keterubah bisi jalai khas ngena ensikal, pejalai kaki
KUCHING: Jalai Sultan Tengah berengkah ari roundabout Yayasan Sarawak nyentuk Damai deka nyadi jalai keterubah ti bisi nyendiaka jalai khas ungkup orang ti mai ensikal ungkup pengelikun penguna jalai.
Sapit Menteri Utiliti enggau Telekomunikasyen Datuk Dr Abdul Rahman Junaidi madahka jalai semanjai 26 kilometer (km) tu ukai semina deka diangkatmanah ungkup jalai khas ngena ensikal tang mega ungkup sida ti bejalai kaki.
“Sekali tu, chara kitai iya nya ngaga jalai baru jemah ila iya nya ngaga jalai khas sida ti mai ensikal sereta mega sida ti bejalai kaki ungkup pengelikun.
“Siti ari chunto projek ti pemadu baru iya nya projek ngangkatmanah Jalai Sultan Tengah berengkah ari roundabout Yayasan Sarawak nyentuk Damai.
“Aku baru diberi penerang minggu nyin kemari ari Perbadanan Pembangunan Ekonomi Sarawak (SEDC) iya nya jalai tu deka nyadi jalai keterubah ungkup sida ti ngena ensikal semanjai 26 km,” ku iya.
Iya madah munyi tu lebuh ti ditemu maya Program Kuching Car Free Morning (KCFM) ba Tengah Laman Tugu Pahlawan ditu kemari ti sama mega bisi digulu Datuk Bandar Kuching Utara Hilmy Othman.
Ku Dr Abdul Rahman agi, mengeri Kuching tu majak
tebilang enggau aktiviti bebasikal lalu ari tu perintah Sarawak nengah Dewan Bandaraya Kuching utara (DBKU) udah ngelangkar nyendiaka jalai khas ungkup orang ti mai ensikal enggau sida ti bejalai kaki.
Bekaul enggau program KCFM ti diatur pegi kemari, Dr Abdul Rahman ngelalau semua peranak di mngeri nyengkaum temuai ngambika nyereta program ba edisyen ti nangkaka tu ila iya nya ninting Hari Minggu keterubah enggau ketiga ninting bulan.
Program KCFM tu ku Dr Abdul Rahman iya nya sebagi ari pengeransing DBKU dalam ngangkatka tikas pemanah rampa menua enggau penyelai ti bisi di mengeri Kuching kelebih agi
ari sukut dagang temuai.
“Nyema kitai beratika ngelingi jalai ke udah ditetapka ungkup program KCFM, tu mungkur kandang menua ti beratka ari sukut dagang temuai.
“Bisi Muzium Budaya Borneo, Kubu Margherita, Jematan Darulhana, Dataran Ibu Pertiwi enggau ke bukai ti ulih matak temuai seraya ti bejalaika pengawa rekreasyen,” ku iya.
Dr Abdul Rahman begulai enggau Hilmy mega udah sama enggau aktiviti senamrobik sebedau ti ngelepaska bala pesereta ‘Marching Band’ enggau pejaai kaki lalu pengudah nya mega sama ngena ensikal ke Tebing Sungai Kuching ke Pangkalan Sapi ari Tugu Pahlawan.