Sarawak chakah dalam mutarka isu ubah iklim dunya: Abang Johari
Nengah pengawa beganti ari nguna ‘bahan api fosil’ ngagai energi ti ulih dikemaru, kurang karbon nentuka pemanah rampa menua ti meruan ”
SANTUBONG: Sarawak terus chakah bejalaika pengawa dalam mutarka isu ubah gaya mua hari tauka iklim dunya enggau beganti ari nguna ‘bahan api fosil’ ngagai energi ti ulih dikemaru sereta kurang karbon.
Premier Sarawak Datuk Patinggi Tan Sri Abang Johari Tun Openg madah, semua raban patut megai tanggungpengawa diri dalam ngadaka rampa menua ti meruan.
“Kitai benung betapi enggau pemar global bekaul enggau ubah iklim lalu semua raban mesti bela nyukung dalam nentuka karbon kurang dilepaska.
“Pia mega, kitai patut sama megai tanggungpengawa enggau nguna energi ti ulih dikemaru sereta chara ti ulih dikemaru dalam pengeransing kitai dikena ngemansangka ekonomi,” ku iya ba pengerami Malam Gala Amal Malaysia-Korea di Damai Lagoon Resort ditu, kena malam Hari Enam nyin tadi.
Ku Abang Johari madah, Sarawak bebendar dalam nyadika nengeri tu nadai ngemansutka karbon.
“Berindik ari tu, aku muji nama ti dipejalaika OCIM Sdn Bhd ti udah ngena chara terus dalam inisiatif gadung dikena mantu Sarawak,” ku iya.
Beserimbai enggau tu, iya ngelalau rayat Sarawak dalam ngangkatka pengelandik dikena nentuka kerejasama enggau pemeranak puku ari dalam enggau menua luar ke deka beranakka puku di nengeri tu.
Nitih ku iya, Sarawak ngembuan mayuh peluang kerejasama rentayan bekal berindik ari bisi mayuh macham pemisi biodiversiti di nengeri tu lalu ari nya, pemindah teknologi endang beguna.
“Dalam pekara tu (pemindah teknologi), OCIM Sdn Bhd udah ngaga tu enggau ngambi bala nembiak di menua tu lalu begulai sama
ngemansutka produk sida empu.
“Aku dipadahka OCIM Sdn Bhd benung ngerembai lalu mayuh rentayan bekal ti disediaka di Sarawak ke alai kitai ulih ngaga kaul kerejasama,” ku iya.
Nyadi palan endur bejalaika pengawa, ku iya nambah, rayat Sarawak patut bebendar ngangkatka pengelandik dikena ngemuntangka kerejasama enggau pemeranak puku lalu pengudah nya nyadi peluang dalam belajarka budaya sida.
“MAlam tu (kilah ensana) kitai bisi peluang meda gempung budaya entara orang Korea enggau Sarawak. Betukar budaya ti manah endang beguna dalam ngerembaika penemu kitai ngeluie garis entara menua lalu berengkah enggau pengawa beraban,” ku iya.
Maya pengerami tu, bisi tiga Gerempung Ukai Dikuasa Perintah (NGO) nerima pemeri entara nya Yayasan
Ilmu Sarawak sepenyampau RM300,000, Generasi Hijau nerima RM300,000 lalu Persatuan Bagi Kebajikan Kanak-Kanak Terencat Akal (PERKATA) Sarawak bulih RM200,000.
Abang Johari mega mujur teulihka RM180,000 nengah pemerindang ‘suara emas’ iya maya pengerami tu.
Sama bisi datai iya nya Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah, Menteri Pemansang Orang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Chairman Perbadanan Pembangunan Ekonomi Sarawak (SEDC) Tan Sri Datuk Amar Abdul Aziz Husain, Penyanding Penemu OCIM Dr. Kim Soo Yeon enggau Chairman Pengatur Malam Gala Amal Malaysia-Korea Puan Sri Datin Amar Nur Ashima Aziz.
“Kitai benung betapi enggau pemar global bekaul enggau ubah iklim lalu semua raban mesti bela nyukung dalam nentuka karbon kurang dilepaska.