Komuniti pupu bansa, jalai pengarap dilalau terus bebasaka pangan diri
SRI AMAN: Komuniti pupu raban bansa enggau jalai pengarap di nengeri tu dipinta ngambika bela bebasaka pangan diri dikena nentuka pemujur nempa komuniti ti harmoni enggau seruran lantang senang.
Sapit Menteri Pelajar, Inovasyen enggau Pemanang Penau Sarawak Datuk Francis Harden Hollis madah, endang nyadi tanggungpengawa semua raban komuniti dalam nentuka pengelantang ti diasaika diatu meruan.
“Nyema komuniti kitai enda bebasaika jalai pengarap tauka tradisyen bansa ke bisi di nengeri tu, udah tentu nadai penyerakup entara kitai.
“Nya alai, ulah ti bebatak asur endang diguna dalam nentuka nengeri enggau menua kitai terus nyapai penyulut,” ku iya.
Iya ti mega Kaban Kunsil Nengeri (ADUN) Simanggang madah munyi tu lebuh ti bejaku ba Pengerami Makai Lemai Taun Baru China 2024 diatur ba Restoren Golden City, Sri Aman ditu.
Nitih ku iya agi, rayat di nengeri tu endang chukup betuah laban ulih idup dalam sebuah komuniti pupu bansa ti bisi megai jalai pengarap Kristian, Islam, Buddha enggau ke bukai lalu bela bebasaka pangan diri.
“Ulah ti baka tu ti dikedeka kitai, lalu mega ulih nerenakka pengeransing beserakup. Kitai chukup temegah ati laban penyerakup nengah faktor jalai pengarao tu endang nyata lebuh komuniti pupu bansa ngintu pengerami hari besai begulai ninting taun,” ku iya nerang.
“Kitai patut andal ati laban ulih ngintu semua pengerami hari besai pupu bansa di nengeri tu baka Taun Baru China, Hari Gawai, Deepavali, Krismas enggau ke bukai.
“Nengah pengerami hari besai tu, komuniti kitai bejalaika pengawa ngabang ke rumah bala bakih enggau kaban belayan ti enda sama jalai pengarap enggau bansa.
“Aku minta ngambika ulah baka tu diteruska ngambika rayat Malaysia bulih pengelantang enggau pemansang ti enda ngetu,” ku iya nyemetak.
Sama bisi datai ba pengerami tu iya nya Tuai Kunsilor Pelilih Menua Sri Aman Anthony Abell Chendan, The Reverend Jackson Jarau ari Gerija St Luke Sri Aman , Temenggong Kueh Aik Seng, Penghulu Tiong Chong Onn, Pengempu Restoren Golden City, Sri Aman enggau ke bukai.