Anyi udah bejadi projek RTP ngemanah parit, dinding ruai Rh Micheal Jarau
KANOWIT: Pengawa bejalaika projek ngemanah parit ngelingi enggau dinding ruai Rumah Micheal Jarau di Nanga Dap nengah agih belanja projek Program Transformasyen Menua Pesisir (RTP) enggau penyampau RM130,000 udah tembu kena ujung taun nyin tadi.
Projek RTP ari agih belanja Kunsil Nengeri (DUN) Ngemah tu iya nya ari baruh kemata ejensi ti bejalaika pengawa Opis Kereja Raya (JKR).
Kena Hari Enam nyin tadi, ADUN Ngemah Anyi Jana udah bejadika projek tu.
Anyi maya jaku pengelalu iya ba pengerami tub ngelalau ngambika kerejasama entara peranak rumah panjai, kunteriktor enggau ejensi ti bejalaika pengawa endang beguna ngambika projek ti baka tu ulih dipejalaika
enggau lanchar.
Kelimpah ari nya, iya mega meri penerang chara deka ngaga peminta projek RTP, projek Mit Menua Pesisir (MRP) enggau Program Pengawa Berumah Rayat Seranta Sarawak (PPRMS) ngagai peranak di kandang menua nya ti bisi datai.
“Aku ngelalau ngambika ketuai komuniti enggau ketuai bansa (KMKK) seruran bisi kaul enggau tetiap ejensi perintah ngambika perintah ulih nemu bekaul enggau penerang sereta ubah ti pemadu baru bekaul enggau
bantu ke bisi disediaka tu,” ku iya.
Beserimbai enggau tu, Anyi mega bisi madah bekaul enggau pelajar ti enda bebayar ke diberi perintah nengeri ngagai anak Sarawak ti benung nyadi buah mulut kemaya hari tu.
Ku iya madah, inisiatif ari perintah nengeri tu ngaul lima buah universiti di Sarawak iya nya Universiti Swinburn, Universiti Curtin, Universiti i-Cat, Kolej Laila Taib (KLT) enggau Universiti Teknologi Sarawak (UTS) ti dipelabaka
deka berengkah ba taun 2026 ila.
“Pelajar ti enda bebayar tu reti nya nadai bebayar ungkup mayar ungkus ngerejista tama belajar aja lalu guna ke bukai baka pemakai enggau palan endur diau agi dibayar nembiak ti nampung pelajar tu empu,” ku iya nerang.
Entara ti bisi datai iya nya bini Anyi Gelim Utan, Sapit Chairman Parti Rakyat Sarawak (PRS) Ngemah Ramba Resang, Ketuai Orang Indu PRS Ngemah Mutang Karani enggau Penghulu Ugap Seribu.