Peranak Sarawak begulai ngintu pengerami hari besai, ngayanka penyerakup pupu bansa

SRI AMAN: Di Sarawak, pengerami ngintu Taun Baru China (TBC) ukai semina ungkup komuniti China aja tang mega sama dirami semua raban bansa nyengkaum Melayu, Iban enggau ke bukai.

Sapit Premier Sarawak Datuk Amar Dr. Sim Kui Hian madah, baka nya sekali penyelai pengerami Taun Baru China di nengeri tu nyentuk mujur matak penyereta ari raban bansa bukai.

“Kitai di Sarawak tu diani pupu raban bansa enggau jalai pengarap, nya alai tetiap musin pengerami hari besai, semua bansa enda ngira China, Iban, Melayu enggau ke bukai deka sama begulai ngintu,” ku iya.

Iya ti mega Menteri Pengerai, Pengawa Berumah enggau Kaunsil Kandang Menua Sarawak madah munyi tu lebuh ti bejaku ba Pengerami Merarau Taun Baru China 2024 ti diatur Gerempung Ketuai Komuniti Bansa China Sri Aman ti diatur ba Restoran Golden City, Sri Aman ditu.

“Kitai ulih meda raban ti bemain tanda singa ke bisi nya ari raban nembiak pupu bansa, kelebih agi maya Taun Baru China ke deka betanda tu ari rumah ke rumah bansa ti ngintu pengerami tu lalu tu semina dipeda bisi ba Sarawak aja.

“Berindik ari mayuh ngintu Taun Baru China di Sarawak, sekeda aktiviti diperambu tumu sebedau Taun Baru China lalu deka dilanjar nyentuk hari ke-15 pengerami hari besai tu,” ku iya.

Beserimbai enggau tu, Kaban Parlimen Sri Aman Datuk Seri Doris Sophia Brodie madahka pengerami TBC ke diintu komuniti China tu ulih ngerapitka kaul beserakup entara komuniti pupu bansa di nengeri tu.

Reti nya, ku iya, bansa bukai baka Iban enggau Melayu ulih sama ngintu pengerami tu dalam sebuah rayat Malaysia.

Sapit Menteri Pelajar, Inovasyen enggau Pemansang Penau Sarawak ti mega Kaban Kunsil Nengeri (ADUN) Simanggang Datuk Francis Harden Hollis sama mega muji inisiatif enggau pengeransing gerempungtutingaturpengerami baka tu ninting taun.

“Tu iya nya kelai pengeransing ti manah lalu ulih ngempung semua ketuai bansa enggau ketuai komuniti ari pupu bansa sereta peranak di menua tu lalu sama ngintu pengerami tu,” ku Harden.

Sama bisi iya nya Tuai Kunsilor Opis Kaunsil Pelilih Menua Sri Aman (MDSA) Anthony Abell Chendan, Temenggong Kueh Aik Seng, Pemancha Lee Siang Hua sereta KMKK ke bukai.

SELAMAT TAUN BARU: Dr. Sim (sepuluh ari kiba), Doris (semilan ari kiba), Kueh (lapan ari kiba), Harden (semilan kanan), Lee (lapan kanan) sereta bala bukai sama melah kek TBC maya pengerami tu.

SAMA BERAMI: Dr. Sim (empat kanan), Harden (tiga kanan), Doris (tiga kiba), Lee (dua kiba) begulai enggau Fishtall TBC maya pengerami nya ditu.