Manual ‘Penilain dan Pencukaian’ PBT Sarawak 2024 patut dikemaru setipak enggau PCDS 2030
Bup Manual ‘Penilain dan Pencukaian’ Raban Bekuasa Kandang Menua (PBT) Sarawak Taun 2024 dikearap ulih dikemaru sereta dikemanahka agi setipak enggau Strategi Pemansang Pengudah COVID19 (PCDS) 2030.
Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil madahka bup manual ke baru dipenyadi nya ti dianggap ‘Bible’ dikearap ulih nyadika garis lalau semua 27 PBT serata nengeri tu ari sukut pengawa mansik dan pekara chukai PBT.
Iya ngarapka bup nya seruran ulih dikemanahka awakka ulih terus relevan dalam bejalaika tanggungpengawa ninting hari.
“Bepelasarka penerang dipadah ngagai aku, manual tu udah disediaka nengah beberapa siri woksyop sereta input enggau kaul ngatur ari mayuh bengkah raban nyengkaum PBT enggau mega Majlis Bandaraya enggau Perbandaran.
“Aku minta kita (PBT) dalam pekara tu, kitai patut ngambi input ari komuniti laban sida bejalaika tanggungpengawa beguna dalam meri kitai input, ambika chunto, pengelemi ba sistem ke udah bisi.
“Aku mega ngarapka kitai ulih ngemaru enggau ngemanahka agi bup manual tu setipak enggau PCDS 2030. Bisi tiga pekara pemun
PCDS 2030, siti ari pekara pemun iya nya pengelantang ekonomi, ti mega nyengkaum ekonomi gadung enggau mega digital,” ku iya.
Iya madahka pekara nya lebuh bejaku seraya bejadika bup Manual ‘Penilaian dan Pencukaian’ Raban Bekuasa Kandang Menua (PBT) Sarawak Taun 2024 ti diatur ba sebuah hotel ditu, kemari.
Bup Manual ‘Penilaian dan Pencukaian’ Raban Bekuasa Kandang Menua (PBT) Sarawak Taun 2024 dikena nyemakaka enggau ngasuh sama standard prosedur pengawa mansik enggau pekara chukai semua PBT di nengeri tu.
Bup Manual nya nyadi garis lalau PBT bejalaika tanggungpengawa enggau pekara chukai.
Woksyop nyendiaka bup nya berengkah dipejalaika ba taun 2023 sereta dipasuk semua PBT enggau kerejasama Majlis Daerah Lundu ti dichiri nyari sekretariat begulai enggau Opis Menteri Pengerai Mensia Mayuh, Pengawa Berumah enggau Perintah Lokal (MPHLG).
Manual keterubah digaga, iya nya Manual Pengawa Mansik ti dichelak ba taun
2002 enggau kerejasama Institut Penilaian Negara (INSPEN), enggau Manual Kadaran dichelak ba taun 2012 asil ari inisiatif Key Focus Activity (KFA) 2012, ti dichelak baru ba taun 2013, ti bisi dikemanahka agi, sereta Malnual Penilain dikemaruka ba taun 2020.
Berindik ari pekara nya, Seksyen Penilaian, Percukaian dan Pengurusan Strata bejalaika inisiatif ngemaruka manual ke udah bisi nengah chara begulaika Manual Penilaian enggau Manual Kadaran nengah chara ngemanahka sekeda prosedur negan sistem eLA2.
Asil ari bup manual nya, dikearapka meri impak manah ngagai PBT baka nambahka penatai pemisi enggau ngurangka chukai pintu betangguh; ngemanahka agi ari sukut kualiti servis nengah pengawa nambahka penatai pemisi.
Nambah nya dikearapka bup manual nya ulih ngemanahka agi pengawa neritka undang-undang enggau sistem pematau; ngurangka audit betanya enggau nambahka penyikar sistem prosedur operasyen standard (SOP) semua PBT.
Sama bisi datai ba pengerami tu kemari, Sapit Sekretari Mendam MPHLG Abu Bakar Sepawi; Datuk Bandar, Majlis Bandaraya Kuching Selatan, Dato Wee Hong Seng enggau Tuai Kunsilor Majlis Perbandaran Kota Samarahan, Datuk Peter Minos enggau sida bukai.