JPS, MDL dipinta mutarka penanggul ampuh bah di Tmn Damai B enggau Sri Patiambun
Opis Parit enggau Entali Ai (JPS) enggau Opis Kaunsil Pelilih Menua Limbang (MDL) patut mutarka penanggul penusah ampuh bah di dua kandang menua ti suah dituntung penusah ngenyit tu di Taman Damai B enggau Taman Sri Patiambun, Limbang.
Sapit Industri Pemakai, Komoditi enggau Pemansang Kandang Menua Datuk Dr Abdul Rahman Ismail madah ninting bsi ujan ti bangat lalu sereta enggau ai pasang besai ti ngujung kededua endur tu ampuh bah nyentuk tama ngagai rumah peranak di kandang menua tu.
Iya madahka penanggul tu mega ngerusakka reta tengkira peranak ti dituntung penusah kelimpah ngampuhka jalai besai.
“Aku minta ngambika ejensi perintah ti bekaul kelebih agi JPS enggau MDL ngambika beratika tu bakani deka mutarka penanggul ampuh bah di Taman Damai B enggau Taman Sri Patiambun.
“Kitai beratikaiya nya gaya parit di Taman Damai B enda diintu lalu bisi pematut
ngaga ‘outlet’ enggau ungkus RM300,000 sereta aku mega minta sida ngelasi parit semin ti endang udah bisi,” ku iya madah ngagai pengarang berita maya ti matau ke Taman Damai B enggau Taman Sri Patiambun kena Hari Satu nyin tadi.
Kaban Kunsil Nengeri (ADUN) Bukit Kota tu madahka peranak di kandang menua ti tekeruga laban penusah ampuh bah mega dilalau ngambika seruran bejejimat lalu ngangkatka tikas pengelikun.
Ku iya penusah ampuh
bah tu ukai semina ngerusakka reta tengira tang mega bisi risiko nyadi ejen ti ngerembaika mayuh macham bansa penyakit.
“Peranak deka betapi enggau bemacham risiko nyengkaum penusah bebadi enggau kena rampit penyakit.
“Penusah ampuh bah tu mega ngujungka nyamuk betelu ba ai ti betimbun lalu risiko penyakit ti datai ari indu utai ba kandang menua ke dituntung penusah ampuh bah mega deka nambah kelebih agi baka penyakit denggi,” ku iya nyemetak.