KPWKK deka ngatur pansik dikena nyikap Sarawak Nuju Nengeri Tuai 2028: Fatimah
LAWAS: Siti pansik deka dipejalaika Sarawak nengah Opis Menteri Pemansang Indu, Nembaik Mit enggau Pengelantang Komuniti (KPWKK) taun tu dikena nyikap Sarawak Nuju Nengeri Tuai 2028.
Menteri iya, Dato Sri Fatimah Abdullah madahka pansik nya deka dipejalaika ngena chara konsortium begulai enggau Swinburne University, Curtin University enggau mega University of Technology Sarawak (UTS) kena ngenegapka polisi ti bekaul.
“Taun tu, kitai deka bejalaika siti pandik dikena nyikap kitai betapi nengeri Sarawak nyadi tuai ba taun 2028.
“Kitai numbuhka konsotium begulai enggau Swinburne enggau Curtin University sereta mega UTS kena bejalaika pansik, ngulihka profil orang tuai di Sarawak, kereban ti bisi di nengeri
Sarawak ungkup orang tuai,” ku iya lebuh bejaku ba pengerami ‘Sejambak Kasih Tahun Baru Cina Bahagian di Hotel Sri Malaysia, Lawas’ ditu ensanus.
Sama bisi, Pemesai Opis Pelilih Menua Lawas Ladin Atok enggau Pemesai Pengelantang Komuniti Bagi Menua Wan Muhammad Hasif Wan Jamari.
Terang iya, opis menteri ngarapka asil pansik nya, sida deka bulih langgur penemu ti pemadu manah di serata Sarawa nyengkaum di kandang mengeri enggau menua pesisir.
Fatimah bejaku baru madahka, nengah pengawa pemansik nya, sida deka bulih profil orang tuai, langgur penemu, latar belakang orang tuai kelimpah isu ti ditapi orang tuai di menua ulu, mengeri enggau menua pesisir.
Berebak enggau tu, ku iya Bantuan Khas Pesakit Buah
Pinggang (BKPBP), iya nya inisitif perintah Sarawak kena mantu ngelempungka tating belanja pesakit nya kelebih agi raban B40 di Sarawak.
“BKPBP dipejalaika perintah Sarawak dikena ngelempungka tating belanja pesakit ti deka ngubat penyakit nya ti udah didiagnosisi enggau End Stage Renal Failure (ESRF) iya nya kegagalan buah pinggang tahap akhir.
“Servis tu diberi pechuma ba sepital perintah tauka klinik pengerai perintah tang pesakit mega patut berubatka nya ba palan perubat peribit enggau gerempung ukai dikuasa perintah (NGO) tauka peribit,” terang iya.
Dulu ari nya, KPWKK nengah Opis Pengelantang Komuniti udah meri dua buah mesin hemodialisis ti berega RM82,300 ke guna pesakit buah pinggang di Sepital Lawas.