UTS bebendar deka nyadi IPT ti tebilang di Malaysia
Nengah chara strategik ti dipejalaika UTS deka teulihka tikas penyulut ti tinggi dalam timpuh ti pandak
SIBU: Universiti Teknologi Sarawak (UTS) bebendar deka nyadi entara Institusyen Pelajar Tinggi (IPT) pemadu manah di Malaysia sereta mega renggat dunya.
Pekara nya dipadahka Chairman iya ti mega Sapit Menteri Pelajar, Inovasyen enggau Pemansang Penau Sarawak, Datuk Dr. Annuar Rapaee.
Dr. Annuar madahka diri mega arap bendar iya nya nengah chara strategik ti dipejalaika UTS deka teulihka tikas penyulut ti tinggi dalam timpuh ti pandak.
“Nya alai kitai patut ngepunka ari diatu kena nentuka UTS nyadi entara universiti pemadu manah di Malaysia enggau mega di dunya.
“Aku amat arap bendar nengah chara matak mayuh kaban akademik datai ngagai UTS, kitai deka mujur ngangkatka penuduk UTS,” ku iya.
Iya madahka pekara nya lebuh dikerandau raban pengarang berita pengudah bejadi Unit Pencetakan Buku UTS ditu, kemari.
Iya enggau bebendar madah bisi sekeda faktor kritikal kena matak kaban akademik ti bekualiti ke UTS enggau entara ia penyulut nembiak.
Nitih ku Annuar, kaban akademik deka agi milih universiti ti ngembuan rikod nembiak ti nyulut.
“Mayuh kaban akademik deka agi nembiak ti nyulut tama ngagai sesebuah universiti kelimpah ari patut nitihka kriteria tama ngagai universiti.
“Kelimpah ari nya, kereban ti disediaka universiti mega amat beguba . Sesebuah universiti baka UTS ti fokus ngagai bidang teknologi, kereban nya patut setipak enggau pemansang pemadu baru dala seni enggau teknologi dikena nentuka penyulut dama pengawa pemansik,” ku iya.
Tang, lebuh ditanya pasal penuduk UTS di Malaysia diatu, Dr. Annuar nerangka iya nya UTS agi baru sereta 10 taun udah ditumbuhka, apin bisi penudak rasmi dalam rintai universiti.
“Universiti selalu ia begunaka lebih ari 25 taun alai ditisih rintai ia. Nya alai, kitai patut meda pemasang universiti kena nentuka penyulut.
“Kami bebendar deka nyadi institusyen pelajar ti tuai, meri empas positif dalam bidang ngajar enggau pengawa pemansik,” ku iya.
Ku iya, enggau komitmen nyendiaka kandang endur akademik ti nyulut sereta ngangkatka kualiti pengawa pemansik, UTS ulih teulihka status nyadi universiti pemadu manah di malaysia sereta nangkan nya, ba renggat antarabansa.
“Aku amat arap bendar nengah chara matak mayuh kaban akademik datai ngagai UTS, kitai deka mujur ngangkatka ” penuduk UTS. Datuk Dr. Annuar Rapaee Sapit Menteri Pelajar, Inovasyen enggau Pemansang Penau Sarawak