Jalai pejalai kaki SK St Anthony deka diberi perabung, lalau ke pengelikun nembiak
BINTULU: Perabung enggau lalau pemegai deka digaga ba jalai pejalai kaki di Sekula Primari (SK) St Anthony ditu dikena nyaga pengelikun semua nembiak enggau pekereja sekula enti gaya hari panas enggau ujan.
PekaranyadipadahkaKaban Kunsil Nengeri (ADUN) Tanjong Batu Johnny Pang maya ngabas sekula nya begulai enggau bala pemesai kanan Lembaga Kemajuan Bintulu (BDA) enggau kaban administrasyen sekula nya kemari.
“Kitai beratika endang amat bisi pematut ti lengkas ngemanah tauka nyeruri sekula tu.
“Projek ti dipinta iya nya masang perabung disambung enggau perabung ke udah bisi ba jalai pejalai kaki di sekula tu enggau lalau pemegai entara kandang endur ti bisi parit,” ku iya.
Pang madahka, tu iya nya chara positif kena ngangkatka pengelikun nembiak di sekula nya.
Nitih ku iya projek nya dipejalai sereta dipelabaka tembu dalam timpuh enam bulan.
“Aku deka terus matau pemansang tu sereta nyukung semua pekara ti mai pemanah ngagai pelajar di sekula tu,” terang iya.
Dalam timpuh ti sama Pang mega betemu enggau sida raban administrasyen Sekula Bansa China (SJKC) Chung Hua lalu berandauka chara bejalaika projek pemansang kereban sekula nya ba tisi jalai sekula nya, kemari.
“Aku enda ngira dini alai betemu, tisi jalai nadai salah asal rayat mudah betemu enggau aku sereta ngenataika peneka sida.
“Pemadu beguna, rayat patut dikemeratka sereta kereja mesti dipejalaika,” ku iya.
Maya betemu nya Pang madahka, raban administrasyen sekula nya mega meri langgur penemu ngambika digaga jalai ti bisi perabung ba alai nembiak nganti apai indai ngambi sida ari sekula tauka nganjung sida ke sekula nya.
“Aku ngasaika amat patut jalai digaga perabung tu kena ngemuntangka apai indai enggau nembiak.
“Projek tu ukai semina [asal ngaga fizikal tang mega nyengkaum pengelantang enggau pengelikun nembaika,” ku iya.
“Ku iya, pengibuh iya ba projek nya chukup dalam sereta ngarapka nya meri penguntung ngagai semua orang.