Jaku Iban patut bisi standard ti sebaka, ku Uggah
Nengah pemisi Diksionari Salin English-Iban ti baru ngarapka Jaku Iban ulih disebakaka kelebih agi di institusyen pelajar
(Pengudah diksionari tu dipenyadi kitai deka tu ulih dikena nyemakaka jaku Iban di sekula enggau institusyen pelajar) Nya mih tuju (dichelak) laban sida ti ngeluar tauka ngasilka tu endang bisi status begulai enggau Gerempung Pemansang Pelajar Jaku Iban (AEDIL) enggau raban pengajar, nya alai sida ngeluarka jaku standard.
KUCHING: Sapit Premier Sarawak, Datuk Amar Douglas Uggah Embas ngarapka Diksionari Salin English-Iban ti baru dipenyadi nya, jaku Iban ulih disebakaka tauka distandardka kelebih agi di institusyen pelajar enggau sekula.
Berebak enggau tu iya meri tabi puji sereta terima kasih ngagai penyelak Diksionari Salin English - Iban ti bisi 65,000 leka jaku iya nya diksionari jaku Iban ti pemadu baru setipak enggau pemansang kemaya hari tu.
“Tadi Dr Lambat Lindong (Penyeraris Projek Diksionari Salin English-Iban) udah nerangka (diksionari tu) dichelak enggau tuju dikena nentuka jaku Iban ulih ngerembai nitihka pemansang kemaya hari tu.
“Nya kebuah ia( diksionari) tu bisi 65,000 leka jaku, aku bisi udah macha sekeda leka jaku (dalam diksionari tu), mayuh leka jaku ti baru.
“(Pengudah diksionari tu dipenyadi kitai deka tu ulih dikena nyemakaka jaku Iban di sekula enggau institusyen pelajar) Nya mih tuju (dichelak) laban sida ti ngeluar tauka ngasilka tu endang bisi status begulai enggau Gerempung Pemansang Pelajar Jaku Iban (AEDIL) enggau raban pengajar, nya alai sida ngeluarka jaku standard,” ku iya.
Uggah madahka pekara nya lebuh dirandau raban pengarang berita pengudah iya bejadi Diksionari Salin English - Iban ti diatur ba Institut Pendidikan Guru Kampus Batu Lintang (IPGKBL) ditu, kemari.
“Standard tu amat beguna laban jaku Iban tu mayuh sereta bisi bida, tang diatu kitai bisi jaku ti standard (dikena), sereta patut ulih dikemaru nitihka pemansang
enggau teknologi pemadu baru,” ku iya.
Dulu ari nya, lebuh bejaku ba pengerami bejadi diksionari nya, Uggah madah diri nyukung pengawa ngasil sereta ngeluarka diksionari nya ti ulih nambahka pengerindu komuniti Iban ngagai jaku setipak ubah.
Iya madahka pengawa nyelak diksionari nya ti diasilka pengelicha Jabatan Pengajian Bahasa Iban, IPG Kampus
Rajang ti mega kaban AEDIL, begulai enggau Dr Lambat ti nyadi penyeraris projek nya, udah meri impak positif ngagai galeri jaku di menua kitai ti ngembuan mayuh bansa enggau etnik.
Iya ti siku orang meri belanja kena bejalaika projek nyelak diksionari nya madahka asil pengawa nya chukup berega sereta besai reti sereta dikearap ulih meri peransang ngagai raban orang pintar
pandai komuniti Iban ngambika terus ngasilka diksionari baka nya tauka utai bukai, ti ulih mantu gangkatka jaku Iban awakka setipak enggau jaku bukai di dunya tu.
Ba jaku pengelalu, Dr Lambat madahka diksionari nya siti projek ti diasilka IPG Kampus Rajang enggau kerejasama AEDIL sereta IPGKBL dalam timpuh pengelama tiga taun enam bulan, ti dipunka ba bulan
Februari 2020 sereta tembu a bulan Ogos 2023.
Ku iya, bisi 11 iku kaban penusun diksionari nya ti bisi lebih ari 65,000 leka jaku ti nyengkaum entri besai enggau subentri , bekulit tebal sereta bisi 698 limpir ti enda nyengkaum pelasar jaku.
“Nyadi puju objektif ngaga Diksionari Salin English-Iban tu iya nya dikena ngiga sereta nempa tipak leka jaku English ba jaku Iban.
“Diksionari tu ukai nerangka reti leka jaku English ngena jaku Iban baka ke dikereja ba diksionari bukai, taja sekeda tipak ba jaku Iban nya endang ulih nerangka diri empu.
“Nya alai diksionari tu dikarapka ulih mantu bala penguna nyalinka jaku English ngagai Jaku Iban dalam mayuh bengkah konteks lalu nyaguka tuju ati enggau niat penguna ngenataika sengkuran runding enggau buah penemu diri dalam jaku Iban ba dunya kemaya hari tu. Tu siti ari kebuah diksionari tu disadang ulih nyadi kereban penyanding ke tau dikena mayuh leman raban penguna jaku Iban,” ku iya seraya madahka asil ari sukung Uggah ti meri ungkup belanja, sida ulih nyelak 1,000 iti.
Sama bisi datai ba pengerami tu kemari, Datuk Patinggi Tan Sri Alfred Jabu Numpang enggau Tan Sri Dato Sri Empiang Jabu; Penyanding Penemu ba Opis Premier Sarawak (Industri Pemakai, Komoditi enggau Pemansang Wilayah) Tan Sri William Mawan Ikom; Direktor IPGKBL Dr. Abang Ismail Abang Julhi; Direktor IPGKR Tahya Sidek; enggau Presiden AEDIL, Mariam Sabai enggau sida bukai.