Palan Servis DAP, FAMA mujur ngatur Program Dagang Agro Madani di Bintangor
Bisi 200 bungkus kombo Madani udah mujur dijual dalam Program Dagang Agro Madani ba Medan Selera Bintangor ti diatur Palan Servis DAP enggau Opis Dagang Betanam Betupi Perintah Besai (FAMA).
Ahli Dewan Negara Roderick Wong Siew Lead madah, program tu udah nerima sambut ti chukup manah ari rayat.
“Program Dagang Madani iya nya program ti bepelasarka pengawa bekelimat lalu ngurangka ungkus pengidup rayat sereta meri peluang bedagang tambah enggau mega ngangkatka penatai pemisi Pesereta Program Ladang Kunterik enggau Orang Dagang nengah konsep bejual terus ngagai penguna.
“Dalam program tu mega, perintah udah bebendar ngelakuka aktiviti tu enggau tuju besai iya nya ngurangka ungkus pengidup rayat sereta ngangkatka penatai pemisi orang dagang betanam betupi,” ku Roderick.
Iya madah munyi tu pengudah ti bisi datai ngagai program tu di Medan Selera Bintangor, kemari.
Dalam program tu mega, Palan Servis DAP mega bisi muka kaunter ngerejister dikena ngemuntangka komuniti di Bintangor ngerejister PADU.
Nitih ku Roderick, prose ngerejister PADU tu endang beguna dikena nentuka rayat ulih nerima subsidi tauka bantu ari perintah jemah ila.
“PADU iya nya sebuah sistem digital ti likun enggau komprehensif, ti mantu dalam digitalisasyen enggau ngasilka analitik ti engkeman.
“Semua rayat Malaysia ti beumur 18 taun ke atas dilalau ngerejister sereta ngemaruka penerang dalam PADU.
“Tu iya nya nentuka rayat ti tau nerima pemaik lalu enda tinggal ati nerima subsidi, bantu enggau ngintu pengelantang pendiau rama nengah sistem PADU,” ku Roderick nambah.