JPBNS dipinta besedia betapi enggau penusah ngenyit maya MTL

Komiti Mutarka Penusah Ngenyit Nengeri Sarawak (JPBNS) di serata nengeri udah dipinta matau sebarang pekara ti ulih nyadi sepemanjai musin Monsun Timur Laut (MTL).

Sapit Premier Sarawak, Datuk Amar Douglas Uggah Embas ti mega chairman JPBNS madahka udah besedia betapi semua penanggul sereta sekretariat komiti nya udah dibuka 24 jam.

“Kitai endang udah muka sekretariat JPBNS 24 jam kenyau ari pun bulan tu tadi, ti enggau tuju matau semua pekara di serata nengeri Sarawak ti nyadi ketegal musin landas, ti ukai semina bah tang nyengkaum tanah tusur enggau jalai alun tusur.

“Komiti tu (JPBNS) berengkah ari renggat pelilih menua ngagai renggat nengeri udah dpinta besdia sereta matau. Opis ti bekaul, kaban JPBNS sekalika pelilih menua, bagi menua tauka nengeri udah dipinta bejalaika pematau. Pemayuh bala pemesai udah besedia, sereta keberan mega udah disediaka,” ku iya.

Uggah ditanya pekara nya pengudah iya bejadi Diksionari Salin English-Iban ti diatur ba Institut Pendidikan Guru Kampus Batu Lintang ditu.

Apin lama, ku iya bisi ngabas dua palan pengenduh di Debak sereta ba palan nya semua udah disediaka komiti.

Lalu iya mega ngingatka orang tikena tasah ketegal Monsun Timur Laut nya ulih mendingka lalau ari komiti, nyema dipinta pindah.

“Pemadu beguna ditu iya nya kitai (JPBNS) mesti nentuka orang ti kena tasah bah nya, enti patut dipindah mesti dipindahka.

“Lalau kitai ngagai sida (ke kena tasah) tu entu dipinta pindah, anang enggai pindah laban tuju ia iya nya pengelikun diri.

“Palan Pengenduh (PPS) udah disikap tauka disediaka pemakai, kereban perubat sereta pengelantang rama. Kitai udah besedia napi sebarang pekara ti nyadi ketegal musin landas tu,” ku iya.

Berebak enggau tu, Menteri Pekara Wang enggau Ekonomi Baru nya nerangka tiap taun kandang endur ti balat kena penusah bah suah berubah.