Wan Junaidi TYT Nengeri Sarawak ke-8, berengkah kemari
KUALA LUMPUR: Tun Dr Wan Junaidi Tuanku Jaafar ti kala nyadi Yang Dipertua Dewan Negara sebedau tu dichiri nyadi Tuai Megai Menua (TYT) Nengeri Sarawak ti kelapan (ke-8), berengkah ari kemari.
Iya nerima surat chiri mangku pengawa nya ari Yang di-Pertuan Agong Al-Sultan Abdullah Ri’ayatuddin AlMustafa
Billah Shah ba ‘Istiadat Pengurniaan Surat Cara Pelantikan Yang Dipertua Negeri Sarawak’ di Balairung Kecil, Istana Negara.
Sama bisi datai ba atur pengawa nya, Raja Permaisuri Agong Tunku Azizah Aminah Maimunah Iskandariah.
Wan Junaidi ti beumur 77 taun, dichiri nyadi TYT Nengeri Sarawak, nitihka Perkara 1 Perlembagaan Negeri Sarawak dalam timpuh empat taun berengkah ari 26 Januari 2024 ngagai 26 Januari 2028.
Iya nganti Tun Pehin Sri Abdul Taib Mahmud ti mangku pengawa nya pengelama tiga penggal berengkah 1 Mac 2014.
Pengudah nerima surat chiri nya, Wan Junaidi mega diberi Darjah Kebesaran Seri Maharaja Mangku Negara ti mai gelar Tun.
Atur pengawa meri gelar nya mega bisi dikemataka Menteri Besai Datuk Seri Anwar Ibrahim, Premier Sarawak Datuk Patinggi Tan Sri Abang Johari Tun Openg enggau Sapit Menteri Besai Datuk Seri Fadillah Yusof.
Sama bisi datai, Tuai Sekretari Menua Tan Sri Mohd Zuki Ali, Yang Dipertua Dewan Rakyat Tan Sri Johari Abdul enggau Menteri Pemansang Indu, Ruang Bilik enggau Komuniti Datuk Seri Nancy Shukri sereta Sapit Menteri Pengerai Datuk Lukanisman Awang Sauni.
Wan Junaidi ada ba Kampung Pendam (diatu Sadong Jaya), Sarawak kena 1 Februari 1946. Iya berengkah nyadi Polis Diraja Malaysia ba taun 1964 sebedau gawa dalam Pasukan Polis Hutan ari taun 1968 ngagai 1973, sereta dalam timpuh nya iya mega kala gawa di Kawasan Keselamatan Rajang (Rascom).
Iya berengkah dalam dunya tauka arena politik ba taun 1990 pengudah menang di sitak Parlimen Batang Lupar ba Pengawa Bepilih Besai (PRU) ke-8 ti ditanka iya dua penggal udah nya, sebedau pindah ngagai Parlimen Santubong ba PRU ke-11 ba taun 2004 lalu mujur ngetanka sitak nya pengelama empat penggal beturut nyentuk ngagai taun 2022.
Ba renggat perintah besai, anak Sarawak tu kala megai sekeda pangku pengawa menteri baka Sapit Menteri Dalam Nengeri ari taun 2013 ngagai 2015, Menteri Pengeraja Asal enggau Rampa Menua (2015 ngagai 2018) enggau Menteri Pemansang Orang Dagang enggau Koperasi (2020 ngagai 2021) kelimpah ari nyadi Menteri ba Opis Menteri Besai (Parlimen enggau Undang-Undang) (2021 ngagai 2022).
Iya mega kala dichiri nyadi Sapit Speaker Dewan Rakyat ari taun 2008 ngagai 2013 enggau Yang DiPertua Dewan Negara ba taun 2023. — Bernama