Raban veteran nengah IBET ngenegapka pengawa nagang rabies di nengeri tu
Kaban Opis Pekara Veteran (JHEV) Raban Soldadu Malaysia (ATM) Pampang Sarawak ti nyadi raban voluntia Immune Belt Enforcment Team (IBET) mujur mantu ngenegapka agi pengawa perintah Sarawak ti nagang kes rabies berampit di nengeri tu.
Sapit Premier Sarawak, Datuk Amar Douglas Uggah Embas beterima kasih ngagai Premier Sarawak Datuk Patinggi Tan Sri Abang Johari
Tun Openg laban ti udah setuju enggau penumbuh IBET, ti bejalaika pengawa enggau manah dalam mantu matau rabies ba garis menua Sarawak ti berengkah ari Lundu nyentuk ke Ba’kelalan.
Uggah ti mega Chairman Komiti Penyangga Penusah Ngenyit Nengeri Sarawak (JPBNS) madahka raban veteran iya nya bekas soldadu di nengeri tu, sereta naka kediatu bisi 32,000 iku veteran nyadi kaban JHEV
Pampang Sarawak.
“Diatu kitai udah rekrut 394 iku vetaran nyadi voluntia mantu Immune Belt Enforcment Team (IBET) kitai ti dipegai Unit Pengelikun enggau Penerit Undang-Undang Sarawak (UKPS).
“Tuju tauka pugu objektif raban (veteran) tu iya nya mantu matau rabies ba garis menua ari Lundu nyentuk ke Ba’kelalan, sereta sida udah bejalaika pengawa enggau manah.
“Aku berandau enggau
Direktor (UKPS) Datuk Dr Chai (Khin Chung) tadi, nitihku iya raban tu udah bejalaika pengawa enggau manah mantu sida iya (UKPNS),” ku iya madah pekara nya ngagai raban pengarang berita, kemari.
Dulu ari nya, Uggah ti mega Menteri Pekara Wang engau Ekonomi Baru ngarika perintah nengeri ngulu pengawa nyemin kubur niang Mejar (KM) Micheal Riman Bugat (B) PGB ba Pendam Bujang Berani, Jalai Taman
Budaya ditu.
Bejaku baru iya madahka raban IBET nya endang dikarap mantu perintah Sarawak nagang penyakit rabies nyadi ba nengeri tu.
“Diatu sida tu udah bejalaika program vaksin enggau manah, baka dipadah ngagai aku, sida tu (IBET) udah meri vaksin urung 92 peratus ngagai raban ti ditaga, (raban tu) mantu (Menteri Industri Pemakai, Komoditi enggau Pemansang Wilayah) Dato Sri Dr Stephen Rundi ngelaban penyakit rabies,” ku iya.
Uggah ti mega Menteri infrastruktur enggau Pemansang Penyangkai Kapal madahka kelimpah ari mantu matau bekaul enggau kes rabies, raban veteran ti nyadi IBET nya mega mantu perintah nengeri betapi enggau penusah ngenyit ti nyadi kelebih agi di menua ulu semanjai garis menua Sarawak.
“Baka ti ditemu, garis menua kelalu jauh sereta begunaka timpuh ti lama alai raban ejensi tauka opis ti bekaul ngelawa kin (menua ulu ti semak garis menua) enti bisi nyadi penusah (baka) bah, angus, kudi, nya alai, sida tu (raban veteran IBET) datai mantu dulu ngesah,” ku iya.
Nyempulang Uggah kemari, Dr. Rundi; Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah enggau sida bukai.