Pengawa nyemin kubur niang Mejar (KM) Micheal Riman lanchar
Nyemin kubur Bujang Berani mai reti ti dalam,siti ari kelai basa ngagai Bujang Berani ti udah nyaga, ngetanka pengelikun menua
KUCHING: Pengawa nyemin kubur niang Mejar (KM) Micheal Riman Bugat (B) PGB mujur diatur sereta mai reti ti chukup besai enggau basa ngagai Bujang Berani nya ti udah berambun nyawa ngetan enggau nyaga pengelikun menua ari labuh ngagai jari munsuh.
Pengawa nyemin nya kemari dipenyadi Sapit Premier Sarawak, Datuk Amar Douglas Uggah Embas ti ngarika perintah Sarawak sereta sama digulu Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah; Menteri Industri Pemakai, Komoditi enggau Pemansang Wilayah Sarawak, Dato Sri Dr. Stephen Rundi Utom; enggau Kaban Parlimen Betong Dr. Richard Rapu.
Uggah lebuh bejaku ba atur pengawa nyemin kubur niang Mejar (KM) Micheal PGB kemari madahka, pengawa nyemin kubur Bujang Berani mai reti ti dalam enggau siti ari kelai basa ngagai Bujang Berani ti udah nyaga enggau ngetanka pengelikun menua.
“Niang Mejar (KM) Michael Riman PGB iya nya siku Bujang Berani ti chukup dibasa ti baruh ati tang terit maya bejalaika tanggungpengawa ti diberi.
“Niang ti diberi pingat Panglima Gagah Berani (PGB) kena 6 Jun 1984 ari DYMM Seri Paduka Baginda Yang DiPertuan Agong ti ke-8 iya nya Al-Marhum Tuanku Sultan Iskandar ibni Al-Marhum Sultan Ismail (Sultan Johor) ketegal pemerani ti nyelai tauka luar sangka maya betachah enggau munsuh di Gopeng, Perak ba taun 1977.
“Maya betachah nya, iya (niang) empu balat bakal ba lengan. Ketegal pemerani nya mega niang Mejar (KM) Micheal Riman PGB udah diberi ensumbar ‘Rimau Garang Batang Malaya, Dengah Mudah Diberi Raja” ti ditulis ba atas kubur iya diatu,” ku Uggah.
Pengawa nyemin kubur niang Mejar (KM) Micheal Riman PGB nya mega digulu bala veteran Raban Soldadu Malaysia (ATM) enggau sida ti sebilik enggau niang.
Uggah berebak enggau tu mega ngingatka orang ke sebilik enggau niang sereta
“
raban veteran ATM ti ditinggalka tauka agi idup, patut belajar ari perangai enggau penyulut niang Mejar (KM) Micheal Riman PGB.
“Kitai ti ditinggalka patut sama terus besaup nyaga pengelikun enggau pemansang
Sarawak enda ngira nama chara.
“Ngarapka raban Veteran Sarawak deka terus tegap betapi penguji diatu enggau liat sereta seruran gagit ngena rambai jaku ‘Agi Idup Agi Ngelaban’,” ku Uggah.
Atur pengawa nyemin kubur nya kemari, dipunka enggau pengawa besembiang ngelekatka regang enggau batu kubur niang Mejar (KM) Micheal Riman PGB ti diuluka Fr Meramat, ditangkan pengawa ‘Tiupan Last Post’, diau jenuh seminit
enggau ‘Tiupan Rouse’.
Nangkan nya, pengawa ngelekatka gambar niang Mejar (KM) Micheal Riman PGB enggau ngengkahka bungai ba batu kubur ti nyadika kelai basa ngagai niang.
Keterubah, Uggah ngelekatka gambar niang Mejar (KM) Micheal Riman PGB sereta ditangkan Abdul Karim; Senior Asisten Komisiner Lucas Aket ti ngarika Pesuruhjaya Polis Sarawak; Dr. Rundi sereta raban Veteran enggau Gedek Bugat ti ngarika sida niang sebilik, ngengkahka bungai ba kubur niang nya.
Kelimpah ari nya, Leftenan General Datuk Stephen Mundaw (B) ti nyadi chairman komiti pengawa nyemin kubur niang Mejar (KM)
Micheal Riman Bugat PGB maya bejaku ba pengerami nya beterima kasih ngagai perintah nengeri ti seruran nyukung enggau bantu dalam ngemujurka semua pengerami nyangkaum pengawa nyemin pendam baka ke
digaga ba kubur niang Mejar (KM) Micheal Riman PGB.
“Enda chukup enti aku enda beterima kasih ngagai semua veteran ATM ti sama ngambi bagi ti berengkah ari pengawa ngubur nyentuk ke sehari tu, pengawa nyemin.
“Meri penyinu ati ngagai semua kitai ti ditinggalka bujang Berani niang Mejar (KM) Micheal Riman PGB.
“Atur pengawa ti diatur kitai sehari tu iya nya ritual kepenudi ke ulih dipejalaika kitai ti nyadi kelai basa sereta pengasih enggau penyayau
kitai ngagai niang. Ngarapka pengasih enggau penyayau tu meruan belama sereta semua pemanah niang terus dalam pengingat kitai,” ku iya.
Bujang Berani menua tu udah nadai kena 7 Ogos 2023 maya umur 71 taun, ketegal
penyakit tungkul sengayuh sereta dikuburka ba Pendam Bujang Berani, Jalai Taman Budaya ditu enggau penuh basa soldadu.
Iya tebilang enggau pemerani ba sekeda siri belaban enggau kominis begulai enggau siku agi bujang berani menua niang Pegawai Waran 1 (B) Datuk Temenggung Kanang Langkau sereta sekeda bujang berani ke bukai.
Iya diberi midul Panglima Gagah Berani (PGB) kena 6 Jun 1984 ari Yang Di-Pertuan Agong Sultan Iskandar Sultan
Ismail, dikena ngaku enggau meri terima kasih ngagai servis enggau pemendar iya nyaga pengelikun menua ari labuh ngagai jari munsuh.
Iya ada ba Rumah Putus Paku, Spaoh Betong. Iya masuk soldadu darat nyadi rekrut kena 22 Jun 1973 sebedau dipasuk ke dalam Raban Keterubah Batalion Kelapan Rejimen Renjer Diraja (RRD) di Kem Terendak, Melaka. Maya nya din iya masuk enggau Platun Kilat tauka Platun Ngalaban.
Sekumbang ke nyadi soldadu,
iya udah enggau sekeda siri betachah baka belaban enggau kominis ba Kampung SerangKampung Galau Hutan Simpan Korbu, Perak kena 1 Jun 1979.
Kena 26 Disember 1977, Micheal betachah enggau munsuh ba Gopeng, Perak dipegai komander Mejar Wong Sing Nang.
Maya ke betachah ba Kampung Galau Korbu, Perak, iya maya nya suba megai pangkat koperal begulai enggau niang Kanang ti maya nya bepangkat sarjan, betachah enggau munsuh dalam operesyen ‘Gerakan Setia’.
Lalu maya betachah nya, iya kena timbak munsuh ari urung penyauh uruh 30 meter ba jari kanan ngujungka balat bakal lalu timpang pendiau seumur idup.
Kelimpah ari nya, iya mega bisi enggau operesyen entara menua di Selatan Thailand, ti dikumbai Operasi Cahaya Bina enggau Operasi Selamat Sawadee.
Ke rikod, iya orang ti keterubah dalam servis soldadu ngena kategori BE udah nya ditikika pangkat nyadi Pegawai Bertauliah nyadi ‘Quatermaster’ ti berengkah enggau pangkat Leftenan, pengudah gawa pengelama 18 tahun.
Iya pinchin mangku pangkat Mejar.
Maya betachah nya, iya (niang) empu balat bakal ba lengan. Ketegal pemerani nya mega niang Mejar (KM) Micheal Riman PGB udah diberi ensumbar ‘Rimau Garang Batang Malaya, Dengah Mudah Diberi Raja’ ti ditulis ba atas ” kubur iya diatu.