Penembu projek ai Pakej 2A ngemanahka agi sistem nyendiaka ai di Asajaya, Sadong Jaya
Penembu projek ai Pakej 2A di Asajaya ti berega RM185 juta deka ngemanahka agi sistem nyendiaka ai ba kandang menua Asajaya enggau Sadong Jaya.
Menteri Utiliti enggau Telekomunikesyen Dato Sri Julaihi Narawi madahka, penembu projek nya mega mantu peranak ti sebedau tu suah betapi suntuk ai enggau ai kurang deras enti maya nuchung tauka mayuh orang ngena ba kandang menua ngelinggi pelilih menua Asajaya enggau Sadong Jaya.
“Pakej 2A iya nya siti ari pakej ti dipejalaika perintah nengeri di bagi menua Samarahan ngena bajet Sarawak empu.
“Skop pakej 2A tu nyengkaum ngaga sembilanTangki Aras Tinggi di Tambirat, Moyan Laut, Asajaya, Sadong Jaya,Semera enggau
Sungai Buloh.
“Kelimpah ari nya mega nyengkaum ngaga tiga Stesen Pam Penggalak di Tambirat, Asajaya enggau Sungai Buloh sereta masang batang paip baru sepemanjai 42.2 km,” ku iya.
Iya madahka pekara nya ti ditulis ba Facebook iya pengudah ngabas projek
nya di Asajaya kena Hari Lima.
Bejaku baru Julaihi madahka, bisi urung 84,000 peranak di kandang menua Asajaya, Sadong Jaya enggau terus ke Sebangan, Sebuyau enggau Simunjan (dua agi pakej ti bebida) bulih penguntung ari penembu pakej tu.
Ku iya, penatai ai iya nya ari Loji Rawatan Air Batu Kitang di Kuching.
“Pengawa ngaga projek ai tu nunjukka pengeran perintah nengeri ti diiring Premier Sarawak ti terus bebendar nyendiaka ai beresi ngagai semua kandang menua di Sarawak, kelebih agi di menua pesisir.
“Kereja tu agi dipejalaika nyentuk semua pengawa nyendiaka ai ulih dijapai,” ku iya.
Sama bisi datai sereta meri penerang Direktor JBALB baru Awang Mohd Fadillah Awang Reduan; Injinir Ai Bagi Menua Samarahan Adzahari; Direktor Ai Opis Menteri, George Lee; enggau Temenggung Bagi Menua Samarahan Chek Bujang sereta staf Opis Nyendiaka Ai Menua Pesisir (JBALB) Bagi Menua Samarahan sereta sida bukai.