Komuniti rumah panjai dilalau numbuhka KRT
Komuniti menua pesisir dilalau numbuhka Kawasan Rukun Tetangga (KRT) kena nempa penyerakup ba sesebengkah kandang endur nya kelebih agi rayat.
Penulung Pemesai Penyerakup Bagi Menua Sibu, Muhamad Zulkefli Mohamad Nazri madahka, nyentuk ngagai taun 2023 bagi menua Sibu bisi 96 KRT nyengkaum pelilih menua Sibu, Selangau enggau Kanowit.
“Ari penyampau semua nya, pelilih menua Selangau semina bisi lima buah KRT aja, ditangkan pelilih menua Kanowit bisi urung 30 lebih buah enggau kebukai nya ari pelilih menua Sibu.
“Objektif penumbuh (KRT) kena bejalaika enda ngira bagi program ti lebih ngagai program nempa penyerakaup di dalam kandang endur nya,” ku iya lebuh dirandau pengarang berita pengudah ngatur aum KRT Sunagi Pak di sebuah hotel ditu, malam Hari Lima.
Iya madahka, penumbuh
KRT mayuh agi di mengeri dibandingka enggau di menua pesisir ti engka enda nemu bisi penguntung ari penumbuh nya.
Zulkefli madahka penumbuh nya bisi empat agenda besai iya nya Gerak Kerja KRT Sejahtera, Likun, Beresi enggau Manah, sereta Gerai ti ditisih ari aktiviti ti meri impak tinggi.
Taja pia, ku iya, KRT enda ulih ditumbuhka sengapa laban ia mesti bepelasarka peminta peranak ari sesebuah endur pendiau nya.
“Selalu ia dalam sesebuah kandang endur deka digazet sereta patut nitih syarat ti ditetapka opis ambika banding pemayuh peranak, berapa pemesai dalam kandang endur nya ti deka ditumbuhka KRT.
“Enda ngira bagi kandang endur ti patut, chunto pemayuh peranak mengeri patut bisi 1,500 iku populasyen, pemesai kandang endur nya juga dikira sebaka di mengeri kandang endur nya mesti enda lebih 10 hektar,” terang iya.
Nitihka iya, KRT mega diberi ungkup belanja maksimum RM6,000 setaun dikena ngatur program sereta aktiviti bekaul nyengkaum baum.
Berindik ari nya, iya bepenemu kandang menua pesisir ti mayuh rumah panjai dilalau numbuhka KRT laban mayuh peguntung dalam ngenegapka penyerakup renggat peranak nya empu sereta aspek pengelikun komuniti lebih agi.
“Enda ngira bagi rumah panjai di sesebuah kandang endur ti bisi tiga ngagai lima buah, ulih minta numbuhka KRT laban populasyen enggau pemesai kandang endur sida ditetapka sereta bebida mimit dibandingka enggau kriteria penumbuh di kandang mengeri.
“Sida ti deka numbuhka KRT ulih ngelawa opis kami di Wisma Persekutuan, Jalan Persiaran Brooke,” ku iya.
MAya baum nya, Sobri Sandom sereta komiti iya sebedau tu dipilih baru nyadi Chairman KRT Sungai Pak ungkup Sesi 2024-2025.