Sarawak bulih ungkup belanja program SBST
Opis Menteri Pengangkut Malaysia (MOT) udah nyendiaka ungkup belanja ngagai Sarawak kena bejalaika program Transformasi Perkhidmatan Bas Henti-Henti (SBST) di Kuching ti dipelaba beoperesyen taun tu.
Pekara nya dipadah pengudah betemu enggau berandau entara Menteri Pengangkut Sarawak Dato Sri Lee Kim Shin enggau Menteri Pengangkut Malaysia Anthony Loke kena 23 Januari tu tadi.
Asil randau nya sama bela setuju ke pekara ti bekaul enggau program sereta projek pemansang ti deka dipejalaika kelebih agi sektor pengangkut di Sarawak.
“Objektif besai program SBST iya nya kena nambahka pemayuh ngena enggau servis bas mensia mayuh sereta ngurangka penyekut kerita ba jalai raya kelebih agi di mengeri.
“Opis Menteri Pengangkut Malaysia udah nyendiaka ungkup belanja dikena SBST di Kuching enggau tinda deka dibuka ngagai kompeni basa menua tu ti beoperesyen di Sarawak.
“Program tu deka diperati tauka dipatau Lembaga Pelesenan Kenderaan Perdagangan (LPKP) Sarawak enggau Opis Menteri Pengangkut Sarawak,” ku penerang Opis Menteri Pengangkut Sarawak kemari.
Kelimpah ari nya Lee maya betemu nya, minta ngambika MOT mantu ngenyampatka pengawa ngemendarka muka jalai baru ungkup servis bas ekspres meraka garis menua.
Ku iya nya nyengkaum nyambungka Kuching, Sarawak enggau Singkawang, Indonesia nengah ICQS Biawak, Lundu, Sarawak.
“Ke diatu, servis bas Kuching-Singkawang diatur ngena chara ‘transfer’ iya nya orang tambang patut ngetu sereta betukar bas dikena di garis menua sebedau neruska pejalai.
“Aku ngarapka jalai tu bulih pemendar ti lengkas enggau ulih dipejalaika ngena chara terus baka Kuching ke Pontianak,” ku iya.
Iya mega ngenang pasal bisi pematut muka baru jalai penerebai entara Kuching enggau Pontianak.
Ku iya, nya amat beguna kena ngangkatka industri dagang temuai, sektor servis enggau dagang entara dua wilayah setipak enggau pemansang kandang menua BIMP-EAGA.
Kelimpah ari nya, dua menteri tu mega setuju ke kerejasama enggau interaksyen entara pemesai opis menteri enggau nengeri dikemanahka agi.
Nya ngambika program pemansang ti dilanggur sereta dikemendarka ba renggat perintah besai bejalai enggau lanchar enggau isu ti dibantaika rayat ulih diputarka enggau jampat.
Lee dalam timpuh sama nyukung Kajian Kemungkinan Kereta Api Trans Borneo (Sarawak - Sabah) ti deka dipejalaika taun tu.
Berebak enggau tu Loke mega madah, iya nya projek ngemanahka Padang Bilun Antarabansa Kuching enggau Padang Bilun Miri deka dulu dikemerat dalam Bajet 2025 ti dibantaika ujung taun tu.
“Lalu pekara bekaul enggau asil chukai jalai enggau sistem parkir patut dirandau enggau silik laban nya bekaul enggau undangundang enggau atur kemaya hari tu,” ku iya.
Sama bisi datai berandau Sapit Menteri Pengangkut Malaysia Datuk Hasbi Habibollah; Tuai Sekretari MOT Dato Jana Santhiran Muniayan; Sapit Menteri Pengangkut Sarawak Datuk Dr Jerip Susil enggau sida bukai.