Fadillah: Penelaba Tun Wan Junaidi pengelebih, aset nengeri Sarawak
Pemayuh peneleba ti dikembuan Tuai Pemegai Menua (TYT) Nengeri Sarawak Tun Dr Wan Junaidi Tuanku Jaafar deka meri pengelebih sereta nyadi aset beguna ngagai nengeri Sarawak.
Sapit Menteri Besai, Datuk Seri Fadillah Yusof madahka, iya (Tun Wan Junaidi) udah lama bejasa ngagai Sarawak sereta Malaysia.
“Berengkah ari latar belakang nyadi raban polis, udah nya nyadi lawyer, Kaban Parlimen enggau Menteri Perintah Besai.
“Kepenudi bendar nyadi Sapit Speaker enggau Speaker Dewan Negara, reti ia penelaba iya chukup mayuh tauka luas.
“Ngena latar belakang peneleba nya, aku arap bendar (pekara) tu deka nyadi aset ngagai nengeri Sarawak iya nya
Tun Wan Junaidi nyadi Tuai Pemegai Menua,” ku iya.
Iya madahka pekara nya lebuh dirandau raban pengarang berita ba pengerami bejadi Gelanggang AlQamar Marapatu enggau Pengisytiharan Pemakaian Tanjak Serinding Awan Pertubuhan Seni Silat Sendeng Sarawak (PSSSS) ditu, kemari.
Fadillah ti mega Kaban Parlimen Petra Jaya madahka, Tun Wan Junaidi mega bisi ngambi bagi ba mayuh bengkah gerempung ukai dikuasa perintah (NGO) sereta mega nulis mayuh bengkah bup.
“Sereta iya mega udah nemuai tauka ninjau serata Sarawak enggau udah tentu meri awak ngagai iya nemu nama ti diguna Sarawak.
“Tu mega seraya lalu ulih ngenegapka agi kaul entara perintah nengeri enggau perintah besai,” ku iya.
Bekaul enggau pekara nya, Fadillah beterima kasih ngagai Yang di-Pertuan Agong kepada Yang di-Pertuan Agong Al-Sultan Abdullah Riayatuddin Al-Mustafa Billah Shah laban ti udah nyirika Tun Wan Junaidi nyadi Tuai Pemegai Menua Nengeri ke-8.
Ditanya bekaul enggau timpuh servis Tun Pehin Sri Abdul Taib Mahmud nyadi TYT ke-7 abis tumu, Fadilah madahka, nya ari baruh bidang kuasa mutlak Yang di-Pertuan Agong.
“Bekaul enggau nya, aku enggai meri sebarang penerang, endang udah kuasa mutlak Yang di-Pertaun Agong,” ku iya.
Timpuh servis Tun Taib nyadi TYT Nengeri Sarawak deka abis kena 28 Februari tu ila sereta iya udah mangku pengawa nya pengelama 10 taun.