Meradong diatu ba pelasar pemansang ti engkeman: Ding
BINTANGOR: Pemansang di Meradong diatu ba pelasar ti manah, ku Kaban Kunsil Nengeri (ADUN) Meradong Datuk Ding Kuong Hiing.
Ku iya, mayuh macham bansa pemansang ti mungkur pengawa ngenegapka perengkaguna infrastruktur, ekonomi enggau rama diatu benung chakah dipejalaika di kandang menua tu.
“Pia mega bisi sekeda nya ari pemansang tu udah tembu lalu udah diasaika komuniti di kandang menua tu.
“Tu mih ti ulih diasaika lebuh administrasyen enggau pengari rayat ba sebuah kandang menua tu ari baruh perabung ti sama laban faktor tu ngemuntangka semua raban bekerejasama dalam nentuka pemansang ti meruan ke ulih diasaika begulai.
“Kitai ngarapka gaya enggau sepenemu tu ulih diteruska jemah ila ungkup pemansang enggau pengelantang begulai,” ku Ding.
Iya madah munyi tu maya Pengerami Makai Lemai Beserimbai enggau Taun Baru China 2024, malam kilah ensana.
Urung 200 iku kaban Parti Sa’Ati Rayat Sarawak (SUPP) Pampang Bintangor udah sama ngerichahka pengerami tu.
Maya pengerami tu mega Ding udah madahka pengandal enggau basa diri sereta meri terima kasih ngagai kaban Parti SUPP Pampang Bintangor laban ti seruran meri sukung ngagai semua pengari rayat di sitak tu.
“Kaul kerejasama entara sama diri deka mai ngagai pemansang di kandang menua tu enggau pemerat guna rayat ulih dikemeratka.
“Maya taun tu, Tebing Sungai Bintangor deka diangkatmanah lalu pengawa ngaga
Pasar Sentral BIntangor mega udah nerima pemendar nengah RADDA Sarawak.
“Kitai ngarapka perengkaguna tu ila deka meri awak ti chukup dalam nyual ungkup bala pedagang ninting ujung minggu lalu mega ulih ngangkatka penatai pemisi peranak,” ku Ding nambah.
Sama bisi maya pengerami tu iya nya pengari SApit Menteri Pengeraja Asal enggau Pemeruan Rampa Menua ti mega Kaban Parlimen Sarikei iya nya Gung Chiu Kion, Sapit Chairman Parti SUPP Pampang BIntangor, Chieng Buong Ong, Ketuai Orang Indu Parti SUPP Pampang BIntangor Kunsilor Chieng Ming Kiong, Ketuai Raban Nembiak Parti SUPP Pampang Bintangor Ley Chee Hua enggau baka ketuai komuniti di kandang menua tu.