Palan Servis Stampin mujur mantaika ripot belanja ungkup taun 2023
KUCHING: Bisi lebih RM4 juta agih belanja ti diberi perintah besai ngagai Palan Servis Stampin udah dipelanja kelebih agi ba konstitusyen nya, semanjai taun nyin kemari.
Kaban Parlimen Stampin Chong Chieng Jen madah, penyampau ke udah dipelanja tu iya nya agih belanja ‘outright grand’ (OG) enggau Projek Mesra Rakyat (PMR) ungkup sitak Kunsil Nengeri (DUN) Batu Kawa, Batu Kitang enggau Kota Sentosa.
Nitih ku iya, dalam taun 2023, Palan Servis Stampin baka palan servis parlimen ke bukai, udah dberi uda agih belanja iya nya OG enggau PMR ari perintah besai enggau penyampau semua nya RM2 juta.
“Nyentuk 15 Disember taun nyin kemari, palan servis (Stampin) udah melanjaka RM2,194,807 ari agih belanja OG kelimpah ari ngemendarka bisi RM1,981,400 agih belanja ari baruh PMR,” ku iya.
Iya madah munyi tu maya aum media bekaul enggau ripot Kaban Parlimen Stampin dalam taun 2023 ba Indu Opis Parti Tindakan Demokratik (DAP) di Lorong Abang Abdul Rahim, ditu kemari.
Chairman DAP Sarawak tu madah, tikas penyampau ti dikena ungkup penyampau semua iya nya 99.4 peratus.
Bejaku silik, Chong madahka iya nya maya 2023, raban sida udah nerima bisi 28 peminta ungkup projek PMR.
“Ari peminta tu bisi
RM1,941,400 (98 peratus) iya nya ungkup tuju pelajar iya nya dikena nyendiaka televisyen pintar enggau ngangkatmanah kereban perengkaguna ngajar di sekula.
“Pia mega RM40,000 ungkup Komiti Pemansang enggau Pengelikun Genturung Pendiau (JKKK) di sitak Stampin,” ku iya ti mega Kaban Kunsil Nengeeri (ADUN) Padungan tu nerang.
Beserimbai enggau tu, ungkup agih belanja OG, raban sida udah nerima sepenyampau 882 peminta dalam taun ti sama.
“Ari peminta tu, bisi RM1,078,300 (49.1 peratus) iya nya ungkup tuju pelajar lalu RM937,007.95 (42.7 peratus) iya nya ungkup gerempung ukai dikuasa perintah (NGO) sereta mega aktiviti pengasih.
“Kelimpah ari tu, bisi RM179,500 (8.2 peratus) ungkup tuju nyaga pengerai,”ku iya nambah.
“Beserimbai enggau tu, penyampau agih belanja semua iya nya RM4.2 juta udah dipelanja ti mungkur RM3,019,700 (72.3 peratus) iya nya ungkup pelajar, RM977,007.95 (23.4 peratus) ungkup NGO enggau program pengasih lalu RM179,500 (4.3 peratus ungkup program nyaga pengerai,” ku iya.
Ku iya nmbah, nyema dibandingka enggau agih belanja pengari rayat nengeri (ADUN) Gabungan Parti Sarawak (GPS), sida diagihka RM9 juta ungkup tetiap DUN ninting taun.
Nya alai, iya ngelalau ADUN ngambika mantaika chara nguna agih belanja di kandang menua sida.
“Tu ngambika rayat nemu bakani pengari rayat sida ngena agih belanja ke diberi perintah,” ku iya.
Sama bisi datai iya nya Pemantu Khas Parlimen Stampin Sim Kiat Leng enggau Jordan Soo Tien Ren sereta Kuching Dapsy Secretary Anthony Chin.