35,885 iku nembiak di Sarawak ngambi peresa SPM berengkah kemari
Bisi 35,885 chalun ngambi peresa betulis Sijil Pelajaran Malaysia (SPM) taun 2023 di 257 palan peresa serata Sarawak berengkah kemari nyentuk 7 Mac 2024.
Direktor Opis Pelajar Sarawak, Datu Dr Azhar Ahmad madahka penyampau nya nyengkaum 149 chalun timpang pendiau ti deka ngambi peresa nya.
“Bisi 395,870 semua chalun udah ngerejista ngambi peresa SPM taun 2023 di 3,340 buah palan peresa serata menua berengkah kena 30 Januari ngagai 7 Mac 2024.
“Di Sarawak aja, kitai bisi 35,885 chalun berejista di 257 palan peresa serata nengeri Sarawak ti deka ngambi peresa SPM,” ku iya.
Iya madahka pekara nya lebuh dirandau raban penulis berita maya ti ngabas chalun ti ngambi peresa SPM ba hari keterubah di Sekolah Seni Malaysia Sarawak ditu, kemari.
Dikena nentuka pengawa ngatur peresa betulis SPM 2023 bejalai enggau lanchar, Azhar madahka, bisi 2,531 iku petugas peresa udah dichiri di serata Sarawak.
Berindik ari pekara nya, iya ngingatka semua chalun peresa SPM Taun 2023 patut nitihka jadual peresa dikena ngulihka penerang pasal hari bulan, jam, kod enggau keretas peresa, sereta atur ti patut dititihka sepemanjai peresa dipejalaika.
“Jadual peresa nya tau diambi ba website Lembaga Peperiksaan (LP) nengah lp.moe.gov.my.
“Chalun mega dikeingat ngambika mai dokumen pengelala diri enggau Pernyataan Pendaftaran Peperiksaanngagai palan peresa,” ku iya.
Nambah nya iya madahka chalun mega patut nitihka prosedur operesyen standard enggau atur ti ditetapka dikena nentuka peresa SPM 2023 nya bejalai enggau lanchar.
“Kelimpah ari nya, sida ditangkan ngambika madahka ngagai sekula tauka Opis pelajar Nengeri (JPN) enggau lengkas nyema enda ulih datai ngambi peresa nya ba paln peresa ti udah ditetapka tauka enda ngira dini palan peresa ti semak ketegal tasah,” ku iya.
Iya mega bebendar madahka Opis Pelajar Malaysia (KPM) komited ngereja enggau pengabis manah dikena nentuka peresa SPM taun 2023 ulih dipejalaika enggau lanchar sereta nithka atur.