Sistem pinchin pengereja pengawa perintah ti diketuka patut dipeda ari perspektif ti dalam
Komuniti patut meda sistem pinchin ti diketuka ungkup pengereja pengawa perintah enggau ngantika nya ngena Kumpulan Wang Simpanan Pekerja (KWSP) ari perspektif ti dalam.
Menteri Dagang Temuai, Main Asal enggau Seni Dato Sri Tiong King Sing madah, ninting taun ari ratusan bilion ringgit dalam bajet, sebagi besai nyentukka puluh bilion ringgit dikena mayar pinchin pengereja pengawa perintah.
“Nyema sistem baru tu enda dipejalaika, perintah deka nangkup belanja pinchin RM120 bilion dalam taun 2040.
“Aku ngarapka semua orang ulih meda mayuh isu ari sukut perspektif ti engkeman agi sereta mega timpuh panjai,” ku iya bejaku maya Pengerami Makai Lemai Taun Baru China Parti Demokratik Progresif (PDP) ba sebuah hotel tebilang ditu, bedau lama ti udah.
Ku Tiong madah, sistem tu ti diketuka udah ngujungka mensia mayuh bejakuka pekara tu nyentukka sekeda ketuai politik ari parti perintah enggau penyakal udah ngena peluang tu lalu salah nguna isu tu.
Iya ti mega Presiden PDP madahka, nyema sistem pinchin pengereja pengawa
perintah tu diketuka nyangka ulih nentuka menua bisi mayuh agi akses ngulihka agih belanja.
“Ambika chunto tu ulih mantu nambahka agi dana ungkup nyukung raban ti kurang benasit, ngangkatmanah infrastruktur menua pesisir, bejalaika program pemansang dikena nentuka pemujur jemah ila ngagai semua rayat Malaysia, nya alai komuniti enda patut ngaga spekulasyen ti nadai ngena bekaul enggau isu tu.
“Tang, kita patut ngerundingka chara ti selampur
bekaul enggau reti kebendar ari reformasyen ti benung ditegika kitai,” ku iya ti mega Kaban Parlimen Bintulu nyemetak.
Tiong madahka iya nya menua diatu ba renggat transformasyen ekonomi ti begunaka mayuh agih belanja nengah sekeda ubah baru dalam sistem.
“Nyema kitai dekaka pemansang ekonomi menua nyadi manah agi lalu ngangkatka tikas besemekih kitai ba renggat antarabansa, endang enda ulih diseliahka dalam bejalaika ubah baru nitihka
serunyut jeman.
“Lalu udah tentu tu deka nguna timpuh mimit ngagai sebarang ubah baru lalu deka nengah timpuh ti mar sebedau nya ulih diteruska enggau lanchar lalu nyapai asil ke dikearapka,” ku iya ti mega Kaban Kunsil Nengeri (ADUN) Dudong.
Dalam pekara bukai, ku iya madah, opis menteri iya mega deka bekerejasama enggau Opis Menteri Dagang Temuai Sarawak dalam ngelaku enggau ngemansangka industri dagang temuai Sarawak ti endang nyelai.
Ku iya nerang, Sibu kebendar nya ngembuan pengelebih dalam ngemansangka dagang temuai, seni enggau main asal ti ngembuan mayuh palan ke manah sereta bisi sejarah baka Sungai Rajang, Pasar Sentral, tokong Tua Pek Kong, Pasar Malam enggau ke bukai.
“Semua tu ngembuan potensial dalam nyadi pakej dagang temuai enggau penyampau dagang ti tegap ke ulih matak temuai antarabansa. Nya alai, aku minta raban organisasyen komuniti kandang menua tu, ketuai di menua tu, pengemeran ejensi dagang temuai enggau ke bukai ngambika sama bekerejasama dalam ngasilka produk ti pemadu manah Sibu lalu nyadika tu palan dagang temuai ti bisi pengeraja enggau main asal lalu nempa mayuh peluang sereta mai ngagai mayuh penatai pemisi ngagai peranak di kandang menua tu,” ku iya nambah.
Sama bisi datai iya nya Sapit Presiden PDP Datuk Henry Harry Jipen, Mandal Presiden PDP Datu Dr Penguang Manggil, ADUN Meluan Rolland Duat, ADUN Krian Friday Belik, Presiden PSB Dato Sri Wong Soon Koh, Mandal Presiden PSB Dr Johnical Rayong Ngipa enggau chairman pengatur program Agatha Ting.